Charles Ndeumane
ONGWEDIVA – Omupresidente gwongundu yopolitika yoSWANU Evilastus Kaaronda okwa yi moonkundathana nOmupresidente woshilongo Nangolo Mbumba moka ya kundathana iipambele ina sha nomahogololo ngoka geli ko muNovemba.
Kaaronda ta ti oonkundathano dhawo odha li dha kwatela mo iipambwele yokwaahe na Iilonga moshilongo, ehumokomeho komikunda, oshowo iinima yilwe mbyoka ya guma Aanamibia.
“Presidente okwa li a hala oku kundathana kombinga yiinima ya yooloka, unene tuu kombinga yomahogololo ngoka ta ge ya muNovemba, oshowo oshinakugwanithwa shetu onga Aanamibia shoku hwahwameka ombepo yombili nuukumwe pethimbo twa taalela omahogololo,” Kaaronda a ti.
Pethimbo a li moonkundathana noshifokundaneki shika Kaaronda okwa dhenge omuthindo kutya aaleli yoongundu dhopapolitika oya pumbwa oku longela kumwe opo ya kandule po uupyakadhi mboka wa taalela Aanamibia ngaashi onkalo yo kwaana iilonga ndjoka, oshowo oku tula Aanamibia tango ngele ta shi ya ketopolo lyoonzo dhopaushitwe dhoshilongo. “Otwi itayela kutya oonzo dhetu dhopaushitwe odhAanamibia onkene Aanamibia ina ya kala ashike ta ya pewa oondjambi omanga aakwiilongo ta ya mono niiyemo ayihe mbyoka ha yi zi moonzo dhetu dhopaushitwe. Otwa pula wo presidente Mbumba a yelithe kutya okwa thikama peni metulo miilonga lyeindilo jaJerry Ekandjo ndyoka lyi li ompinge nomashenge oshoka emweno lyapresidente ota li eta omaipulo ogendji moshigwana,” osho Kaaronda a popi.
Kaaronda okwa ti ye naMbumba oya tunga po ekwatathano ewanawa ndyoka lya simana oku kwatela po ombili nuukumwe, oshowo oku longela kumwe moku hwepopeka onkalo yopamahupilo yAanamibia.
Okwa gwedha po ta ti oya kundathana kombinga yomadhipago ganyanyalitha ngoka ga ningilwa aaherero pethimbo lyiita osho iifuta, ta ti osha pumbiwa oku kwatela mo aantu ayehe mboka ya gumwa koshinima shoka, mwa kwatelwa mboka ya kalelwa po komalelo gopamithigululwakalo ngoka inaa ga ndhidhilikwa kepangelo.
Aaleli mboka yaali oya kundathana wo nkene uunafaalama wokomikunda wu na oku yambulwa po opo aanafaama mboka ya vule oku mona omikuli nkoombaanga ta ya longitha omapya gawo ngaashi aanafaalama aanene ha ya pewa omikuli ta ya longitha oofaalama dhawo onga omakwashilipaleko.