Auleria Wakudumo 

Ombelewa yoSwapo moshikandjo shaKongo oya lukilwa pambelewa omulumenhu wotete woshilongo Epaphras Ndaitwah. Ndaitwah okwa lukilwa ombelewa ei molwoupenda noufule waye oo a longa okuxumifa eliko loshilongo pombada omanga oshilongo inashi manguluka fiyo opaife. 

Pefimbo ta patulula ombelewa pambelewa, Ndaitwah okwa holola olupandu kelelo longudu tai pangele. 

Ndaitwah okwa twa yo omukumo ovalanduli vongudu opo va pame meitavelo nokudiininina ongudu Swapo opo va tunge nokuyambula po oshilongo. 

“Natu kwashilipaleke kutya ohatu twikile okulela mouyuuki mukeshe osho hatu ka ninga. 

Ohandi indile yo ovakwashiwana amushe mu li apa nena opo mu holoke momwaalu muhapu momahoololo twa taalela ookansela nomalelo opaitukulwa mo26 Novemba neudo,” Ndaitwah ta ti ngaho. 

Ndaitwah okwa holola yo kutya epangelo otali longo noudiinini okukwashilipaleka kutya ola twala exumokomesho nomayakulo popepi noshiwana shalo. 

Ngoloneya woshitukulwa shaHangwena Kadiva Hamutumwa okwa pandula elelo lodoolopa yaKongo eshi la lukila omulumenhu woshilongo. Hamutumwa okwa indila ombelewa ei opo i yandje omayakulo ayo koshiwana nokuyandja omapukululo opapolitika moshiwana. 

“Ombelewa ei twa lukila omulumenhu wetu woshilongo nena otai kala eumbo nomutumba woilonga yopapolitika modoolopa. Omo ovanhu tava kala popepi nongudu yoSwapo. 

Ovanhu otava kala ve na oukumwe nokulongekidila epupi tali ya omufyuululwakalo wongudu yoSwapo,” Hamutumwa ta fatulula ngaho. 

Pepatululo lombelewa opa li pe na eendaka doonakulwa vakulu tava imbi omaimbilo ongudu yoSwapo oo kwa li haa imbwa meengoyo. 

Oonakulwa vakulu ovali yo tave litange nokulitumbula kondadalunde osho tashi holola etumba nenyanyu lokumona ombelewa yoSwapo ashike unenenene osheshi ya lukilwa omukwaita mukwao Epaphras Ndaitwah. 

Ombelewa Epaphras Ndaitwah otai ka teelelwa i kale tai dana onghandangala okuunguneka oshiwana shaKongo, tai kwafele odiililo yongudu tai pangele osho yo okukwatela komesho oiniwe yoonakulwa vakulu. -wakudumoauleria@gmail.com