Omuulikwapresidente gwongundu tayi lele Netumbo Nandi-Ndaitwah okwa pititha omushangwauvaneki gomahogololo ngoka taga ka kala ko nuumvo muNovomba momasiku 27.
Momushangwa ngoka omwa totomonwa ashihe shoka ongundu Swapo tayi ka ningila oshigwana oshowo shoka ya kala noku shi longela oshowo nkene ya lundulula oonkalo dha kala dha taalela oshilongo shika.
Omuulikwapresidente Nandi-Ndaitwah sho a pititha omushangwa ngoka koWindhoek mokapale kemanguluko Olyomakaya okwa pula oshigwana shaNamibia shi kale shi na omukumo neyinekelo muyo osho wo sho taya longululula omauvaneko gawo yo ya vule okulongela nokugandja omayakulo koshigwana shawo.
“Shoka sha tulwa pamushangwauvaneki otashi ka tulwa miilonga momukokomoko gomimvo ntano komeho, sigo 2030. Shoka twa uvaneke itashi popiwa ashike ihe otashi ningwa nelalakano lyokuhumitha komeho oshilongo shetu,’’ Nandi-Ndaitwah ta ti ngaaka.
Ta gwedha po ta ti, omushangwa ngoka otagu popi peha lyongundu Swapo osho wo omuulikwahogololwa gongundu tayi pangele.
Ta ti, ongundu Swapo oya longo iilonga oyindji ya simana mbyoka tayi ulike nokukwashilipaleka uuwanawa nelalakano lyongundu.
“Otu wete aanyasha yu uka komutumba gwopashigwana, nelalakano lyokugandja omayele gawo opo oshilongo shika shi hume komeho, ano tu inekeleleni,” ta popi ngaaka.
Nandi-Ndaitwah okwa yelitha kutya ina hala okulela oshigwana sha topoka, ihe okwa hala uukumwe, ombili nelongelokumwe oshoka ayihe kumwe mbyoka otayi humitha komeho.
Ta gwedha po kutya uuna oshilongo tashi longele kumwe otashi humu komeho.
“Swapo ota kwashilipaleke kutya uushitwe moNamibia otau ka yambidhidha Aanamibia ayehe okupitila momikalo dha yooloka tadhi gwedhwa po. Shoka otashi ka eta po iilonga oyindji nokukokeka eliko lyoshilongo osho wo okuhumitha komeho oshilongo shika,’’ ta popi ngaaka.
Nandi-Ndaitwah okwa ti aagundjuka otaya ka pewa iilonga notaya ka yambidhidhwa niikwathitho ya vule oku ya po noompito dhiilonga yo ya vule okugandja omayakulo moshilongo.
Natango okwa popi kutya otaya ka sila oshimpwiyu oshinene omandiki omanene haga gandja nokudheula Aanamibia ya mone uunongo.
“Iikulya, uunamapya owo esipa lyoshilongo shetu, sho osho shoka ongundu ndjika otayi ka gandja oompito dha gwana opo oshigwana shi vule okulonga iikulya , ekandulepo lyondjala oshowo okwiilongela nokweeta po oompito dhiilonga moshigwana,’’Nandi-Ndaitwah ta popi ngaaka.
Omuulikwapresidente okwa popi wo kutya elongo lyopevi otali ka talika wo muule, sho aanona taya ka pewa iilongitho yopautekenika ya longekidhilwe onakuyiwa ndjoka ngashiingeyi ya ikolelela ashike kuutekenika.
Okwa popi wo uuhaku, mboka hau dhana onkandangala okukaleka po uundjolowele waakwashigwana, onkene otaya ka yambidhidha noompumbwe adhihe tadhi pumbiwa.
“Nonando okumona omalukalwa oshowo oopolota moshilongo sha kala uupyakadhi okuza nkene oshilongo sha mangulukile, otwa longa lela notwa kambadhala okulundulula onkalo,’’ ta ti ngaaka.
Nandi-Ndaitwah okwa gwedha po kutya otaya ka lundulula oonkalo adhihe dha gwilila po oshigwana.
Ta ti, ashihe a uvaneke otashi kala sha ningwa momukomoko ngoka sigo 2030.