NKURENKURU
Ongundu yoSwapo konyala yi yangate po iipundi ayihe yelelo lyondoolopa ndjika ompe momahogololo gookansela yondoolopa ngoka ga ningilwe metitano lya zi poNkurenkuru moshitopolwa shaKavango, sho ya sindana iipundi ihamano yomiipundi iheyali. Republican Party (RP) oyo ashike ongundu yompilamena momahogololo ngaka ndjoka ye shi pondola okulikola oshipundi shimwe. Pauyelele okuza kOkomisi yOmahogololo moNamibia (Electoral Commission of Namibia -ECN), ongundu yoSwapo oya sindana nomawi 1375 ngoka ge lile po iipundi ihamano melelo ndika lyopandoolopa.
RP okwa mona omawi 103 omanga oongundu oonkwawo inadhi shi pondola okulikola iipundi. Oongundu dhika ongaashi CoD ndjoka ya mona omawi 29, DTA 12 noNUDO omawi gahamano. Omuunganeki goSwapo moshitopolwa shaKavango, Vincent Likoro ota ti omayalulo giizemo yomahogololo mEtitano ndyoka oga kala gi ipyakidhilwa nago sigo opokati kuusiku, nota hokolola kutya omalongekidho agehe gomahogololo oga enda pauyuuki noga li ga manguluka. Likoro ta pandula oRP sho oyo ashike ongundu yompilamena ye shi pondola okumona oshipundi momahogololo ngaka.
“Aakalimo ya konda oopelesenda 90 moNkurenkuru oya popya okupitila mokaketha komahogololo naashika otashi ulike eineekelo lyaantu moSwapo, kakele oopelesenda inadhi konda 15 dhaantu mboka yi inyolitha inaya hogolola oshi li elimbililo kutse. Kakele otwa nyanyukilwa iizemo, niilonga yomazigudhe oye tu tegelela ngashingeyi okupendula po ondoolopa yaNkurenkuru. Tse otu na oshinakugwanithwa oshinene nosho meendelelo okushilipaleka kutya aakalimo yomoNkurenkuru oya mona omayakulo,” Likoro ta ti.
Ongundu yoSwapo okwa li ashike ya kamba ko omawi 37 opo andola yi yangate po omawi agehe. Kakele oRP ndjoka ya mono oshipundi shimwe oye shi tala ko esindano enene moNkurenkuru ndjoka ya kala ya talika ko ondoolopa yAakwaswapo.
Oongundu oonkwawo oCoD, DTA noNUDO nadho odha holola omaiyuvito gadho shi nasha nomukalo gomahogololo nkene gwa enda, kutya ogwa li gwa manguluka nopauyuuki.
“Ngame onda nyanyukilwa omukalo gweunganeko lyomahogololo. Okwa li nda tegelela ongundu yandje yi mone oshipundi shimwe nenge iyali, ihe inatu shi pondola. Ishewe otwa pumbwa okupandula oECN sho ya endeleleke eyalulo lyomawi. Shika oshi li onkatu ombwanawa,” omukakelipo goNUDO Theophelus Uahongoro ta ti.
Shikere Kahguyu goCoD naye ota tsu kumwe naashoka sha popiwa kumukwawo, ta ti iinima ayihe oya enda nawa, nonande onkalo oya li ondhigu kuyo okulikola oshipundi.
Kuyele metitano omanga aantu inaya tameka okuhogolola, aakalimo omathele oya mbombolokele komahala gomahogololo gahamano, omanga ongundu yimwe ya kala tayi talele po omikunda dhayooloka mondoolopa ndjika. Omahala agehe gokuhogololitha oga tamekele potundi ontiheyali yongula nokupata pomugoyi kongulohi.
Omukuluntuwiliki goECN, Philemon Kanime ota ti omukalo gokuhogololitha ogwa enda nawa lela unene sho Okomisi ya longitha uutekenika wopaekompiuta nosatelite. Aakalimo ayehe kumwe 1782 oya li yi inyolitha okukutha ombinga momahogololo ngaka, mokati kawo aantu 1 527 oya hogolola.
Ookansela aape yongundu yoSwapo oyo Ausiku H. Heikki, Kadubuli N. Hendrina, Sikwaya Mirjam, Kandjimi S. Erastus, Kanyanga K. Beatha naNgoma M. Thomas. Omanga kansela goRP oye Simbungu Reino. Ookansela ayehe mbaka okwa li ya ganene oya iilonga yawo eti 28 March 2007 poELCIN High School moNkurenkuru komeho gaMengestrata….