MoVenduka-Mbunga politika zoSWAPO zina bubuka nononkondo mokukumbururako komasanseko gomadona aga gatamba presidente gombunga ezi kamarada Sam Nuyoma,eyi ngatjanga Phil yaNangoloh vatulire mosayitunga zoWindhoek Observer. Konyara makwedi ntantatu gana pitipo apa yatameka kumoneka yininke vatura edina asi Expose 1,Mbongarero zontjima-ntjima zombunga esi kavahingilire mosikondovike kasipwire nokutura ekumbururo lyawo kumwe, omu kavatente asi tumbungagona twahana mutompo kwalipakerera kumwe vatjange yiporoporo nokutjateka edina lyapresidente goSWAPO nahena guhye muhoko.Ya Nangolo yiuyungwa yendi kwademenena tupu unene pombapira ezi gatjanga murwi gwanare gwaSuid Afrika Magnus Malan,omu vatjanga asi apa vawizire Nuyoma naPohamba moNamibia mwaNsinano 1966,rugendo rwawo oru kwarufutilire mbunga zaAmerika zidina pausupi CIA,Mallan simpe kwagwedako asi Nuyoma kwayakere sivike moWindhoek,ano epangero eli lyakereko kwatokwere kumutengwida oku ana kutunda morwa vanagwana eyi vana hara. Epongo eli lyontjima-ntjima zoSWAPO kavageve ruguwo rwawo asi morwa sinke mwene ogu Malan ana kutumbwira Nuyoma gelike ana nkenye apa ngagendi ngagendi kumwe noPohamba.Awo yiyo kavayikandwirepo asi rugendo oru kwarufutilire mbunga ezi ngava tumbura asi OAU,ano ntaantani AU.Epongo eli yiyo kalitokwere kutura yiviyauka momuzaro gomuwa ndi asi melikwamo omu yawapera.Kumbu kazikere asi mwaNsinano 1966, etokoro kwalitulirepo nompitisili asi presidente napresidente gokukwateramo uye wina age Mushake Muyongo vahepa kutengura koWindhoek vayarwanese epangero eli lyakereko lyoukoloni.Yipo nye asi kamarada Nuyoma naMuyongo yipo vakatukire moDar es Salaam mwaNsinano 19,1966, nodira ezi ngavatumbura asi East Afrika Airways vaze koNairobi,koKenya. Opo vakerenye ngoso yipo vavatanterere asi dira ezi zokuza zaBriatiye kapi zina kuza hena,asi vapite zaEntebbe Aiport Kampala, Uganda,vaze koLusaka,Zambia.Morwa konda nye ozo awo yiyo vatengwire koDar es Salaam ano mokutengura kwawo tavasikameke pokapare ngavatumbura asi Mbeye,moTanzania.Ano kutunda opo awo tava tengura nye koLusaka oku gakavatambwire Pohamba siruwo sina age mukarelipo mbunga zoSWAPO moZambia.Ano tupu vakasikire Muyongo taretapo magano asi ezimo lyendi kuna kukora kapi ana kuza hena oku vana vatumu,Pohamba yipo gatokwere asi tani zi naNuyoma koWindhoek.Ano owo vavali kapi vagendera hena modira,awo kwaruganesere eroli eli lyakereko lyoSWAPO kakere kalyo vawize koLivingstone,Zambia, awo kwayasikire konyara 02h00, 20 Nsinano 1966.Ezuva lyoolyo Nuyoma naPohamba yipo vatukire nodira zaBechuanaland National Airline dogoro moWindhoek.Apa vahere kusika pepi nokutembera musingi dira ozo tava mutantere atembere kokapare kaHosea Kutako International Airport,aka kakere asi kuna kukawapukurura. Ano nompitisili doSWAPO nononkwami ava vakere mosirongo kwakandindilire nompitisili dawo edi mbali kokapare kaEros asi ngano vavatambure.Tupu vanakuyasika muporosi gosirumbu nare ana penunu mbapira zina kutanta asi kamarada Nuyoma vamukwate,awo kwaya sikire konyara 13h00,asi morwa age kwatundire mosirongo kwahana nombapira pulisiro ndi asi passport meraka lyovakwetu.Kamarada Pohamba nage tavamukwata kukwama epuko lyoolyo lyamukwawo zendi.Awo makura tavavatwara kevango ngavatumbura asi Criminal Investigation Department Headqueters,oku vakavazedililire nokuvapuragera.Konyima zokuvapuragera yiyo vavatwere kopolisitasi vakavazedilire mevango limwe tupu.Ngurangura zokukwamako takuwiza vaporosi ntazimwe nokuyavatantera asi awo kava wizire mosirongo pwahana asi paveta ngesi tava vatengwida koZambia. Awo yipo vavatengwidire koZambia ezuva lyoolyo kapi vakere mazuva gatano,moomu ana kukumbagera Malan,vili 07h00,mo21Nsinano 1966.Kamarada Pohamba takakara moLusaka,Zambia ano Kamarada Nuyoma takatwikira koDar es Salaam,Tanzania.Morwa mokuvatengwida mosirongo sawo sofwererwa mbunga ezi zaSWAPO yipo zarwanesere mokulikida runyegenyo rwawo nokuwapayika emukurugongi moLonden,nokutanta asi kapi vana hara hena epongero lyoumbondo lyaSuid Afrika.Epongo eli kalikereko sikwa ntani kava tente asi eyi yokuuyunga Nuyoma momudona rambangako naYaNangoloh kapisi yipe.Mo1987, YaNangolo kwazigidire sigongi sovakurona moStrasbourg, France,omu gakatanterere vantu asi mukadi gumwe kavamutoonene,nye ogu kamutoonene kamarada Sam Nuyoma.Apa vayikona-konene tavayagwana asi mwato usili mesanseko eli nahena kwato mukadi ogu vatoonene, kweyreteserepo tupu asi varangapeke emanguruko lyaNamibia.Ya Nangolo simpe kageve nage nkumbu ezi kazi kere nomapenuno ntazimwe, nye kapi kageve evhatururo asi morwa sinke ana kusigirako Pohamba,ogu gakere asi nage gumwe gosigendo oso. Konyima yiyo kaya pulire asi age kwakara noudigu naNuyoma,yipo nye ana kutjangera masanseko gangesi. Age katente asi eyi kwatameka paapa Nuyoma gamutumbura asi age esege ndi asi muntu gwina akara kumwe panyama namukwawo goruharoororo ngwendi asi mukadi nomukdi ndi asi mugara nomugara. Age kuna kupatana asi Nuyoma kwawizire gelike kapisi naPohamba. Udigu ou waYaNangolo kapi kaukere pilikwamo, nye kayitumbwire Nuyoma mosiuyngwa sendi apa kazegwilire epongo eli lyontjima-ntjima zoSWAPO moWindhoek, mosikondovike somazuva 12-14 Pembankuru 2007.