Auleria Wakudumo
Omukainhu weedula 36, oo eli omutekuli wounona voufiye, veli kepango oshoyo ovo inava halika kovadali vavo mendiki leefiye hali ifanwa Martha Mwadinomho mOndiihaluka moshitukulwa shaHangwena ota pula koshiwana ekwafo opo a fikameke po onhele younona veefiye.
Glemina Ndeshipanda Mwatukange okwa tota endiki leefiye, la lukilwa ohamba yaUkwanyama meekulu Mwadinomho opo a kwafe nokutekula ounona ovo vehena ovakulunhu.
Mwatukange okwati onga omutekuli wounona voufiye noukwanaluhepo, okwa ufwa ashike a kale ena ounona vaheyali mwa kwatelwa vaye ashike paife okuna ounona omulongo navatatu veli meumbo laye.
“Molwa omwaalu wounona tau indjipala efiku nefiku, onda kwatwa kediladilo opo ndi tote onhele yeefiye opo ashike ndi dule okukwafa ounona va hapu. Ohandi dengelwa kouministeli woukashike kookanhu nonghalonawaya yokaana opo ndi ka tale ounona ashike molwa onhele paife osha ninga shidjuu molwa eenduda odo dihepo. Onhele opo ili nale, yakwashilipalekwa kumwene womukunda oshoyo ouministeli womapya, edu nomeva ashike kapena etungo lasha,” Mwatukange ta ti.
Mwatukange okwati ova putuka ounona omilongo mbali nasha navahapu omo naye a kwatelwa kavena ovadali, ova tekulwa ashike kuinakulu. Otati ye shaashi oye ali omukulunhu kuvakwao, osha eta opo a kale ta fiile oshisho oundenge vaye vanini. Okudja kounona, okwati okwa kala alushe helitu omukumo kutya ngeenge okwa kulu ndele ta mono oilonga, ota ka kwafela ounona ovo veli momhumbwe.
Nonande a dopa ondodo 10 moipundi, okwa twikila okufikila ocompiuta nokwa longa moshipangelo shaNgela onga omunambelewa. Mengela okwa mona nghene ounona tava mono oixuna nokwati vati osha endifa omitima waye neenghono nokumudimbulukifa oluhepo laye okudja kounona.
Okwati shaashi okwa kala alushe okupopya nghene a hala okukwafela ounona voukwanaluhepo, kaume kaye okwemu ningila onhele (oipeleki ina omadimo avail) opo a tote onhele yee a tekule ounona.
“Onda hovela nounona vatatu ovo nda kala handi va fiile oshisho nonande ovali veli monghalo ii fiyo omalutu ta eya kondjila.
Elunduluko lounona vatatu votete ola twange omukumo nonda ninga onghendabala okuya kouministeli woukashike kookanhu nonda pewa epikilo paveta okudja mo2018 okutekula ounona,” Mwatukange ta ti.
Mwatukange okwati fiku a ile kouministeli woukashike kookanhu, okwa shakena nameekulu Mwadinomho naye ena edilaadilo lafaafana sho osho sha eta emu lukile onhele oyo.
Onda pumbwa unene eenduda dokunangala ounona shaashi inadi wana vali, oikutu, omakumbafa, oinakuwanifa yokofikola, naikwao imwe.
Natango ota indile koshiwana unene ovanangeshefa, eeminista, ovanasamaliya ovanamutimanghenda opo va ete po eumbo lounona, vaka kalemo opo ndi dule okutambula ounona natango ve li momumbwe.
“Ohandi indile opo tu keeleleni omafyo ounona oshoyo ounona ovo tava ekelwashi, tu keeleleni omahepeko ounona opo eendjodi dounona voukwanaluhepo nado ditwe.
Ouministeli woukashike kookanhu owe mu pula vati omangela (oplan) yetungo opo va tameke okumona omakwafo okudja kouministeli ashike vati kapena nee omatungo fiyo opapa.
“Onhele ei ngeenge oya ka kala ina omaumbo ile eenduda da wana ohatu ka kala tuna oupakete vouyelele meedolopa adishe na keshe ou ena edimo ndele okuna edilaadilo loku ekelashi okaana ile ine ka hala vali, ponhele yoku ka ekelashi ohatu ka yandja omatumwalaka opo va tule ounona moupakete ovo tava ka kala va amenwa fye tuva ilepo opo tu amene eemwenyo dounona vetu, dovatekulu vetu noudenge vetu,” Mwatukange ta ti.