Sho nda thiki pegumbo, onda mono aantu ya ngundumana, nohauto yopolisi yili pegumbo, omanga yamwe taya ti, nandi kwatwe. Shoka okwali sha pendje kutya kaapena we aantu.
Ndhoka okwali dha popiwa kuKatrina Akooko, yina yaakwanambwiyu mboka kwali yasi sho ya pile mondunda momukunda Okankete, momundhingoloko gOndonga.
‘’Ondali nda pula kutya naya pendje omwaalu gwaanona ya pila mo, oshoka ondishishi kutya opena mboka ya pila mo,” ta hokolola ngaaka.
Oshali sha kwata ethimbo, nonando ayehe mboka kwali nda adha po otaya ti ashike, aakwana, aakwana ihe itaya popi ya mane, shoka kwali natango she mupe ethano kutya aakwanambwiyu ye ya hulu ko.
“Okwali nda za mo megumbo nda ka konga omuniilonga omupe goku kala naanona megumbo, oshoka ngoka kwali ha kala nayo shito okwali nde mu laleke esiku olyo tuu ndyoka,” ta ti ngaaka.
Ta ti, omanga ali eli kondoolopa okwali a ndhengelwa kaashinda ta lombwela kutya, egumbo lyawo olya yaka omulilo.
“Nonando okwali nda kambandhala okupula kutya ope na ngoka a pile mo, ka kwali nda yamukulwa, onda lombwela ashike kutya nandi thike ashike,” ta gwedha po ngaaka.
Akooko ta ti, nonado shoka sha holoka pethimbo ndika, aanona mboka hasho kwali oshikando sho tango taya thigwa megumbo oyo awike, oya kala haya thigwa nale megumbo omanga omuniilonga ngoka kaa li po.
Ta gwedha po ta ti, oshilalo shika otashi luluma noonkondo, aakwanambwiyu ye ya yi.
“Mondunda moka omwa pile iikutu yaanona yandje ayehe, omakumbatha nomataleshe niikwawo oyindji, onda thigwa pomutenya lela,” ta popi ngaaka.
Ta ti, ota indile moshigwana, opo a yambindhindhwe na kehe shoka shili po, oshoka kena iiyemo ya kola, nonando oha nyangandhala mpeya naampeya.
Kehe ngoka taka yambindhindha na ndhenge konomola 081 622 3671.
Aakwana mbano, ya tseyika nomandhina Katrina na Loide Kanyanga, oya si sho ya pile mondunda yo kulala mehuulilo shiwike momukunda Okankete momundhingoloko Etayi.
Otaku hokololwa kutya aanona ndhoka yali yena omvula yimwe noomwendhi ne, okwali dha kotha, ethimbo omulilo kwali gwa yaka ondunda moka kwali dha lala.
Opolisi oya ti, omulilo ngoka okwali gwa etwa ko kamwayina kaakwanambwiyu komimvo ndatu, hoka kwali anuwa taka ndhana nokapalwa.
Ya hokolola kutya, aanona mboka ayehe okwa li yeli metononatelo lyomumwayina gomumati gomimvo 12 omanga aakuluntu yali ya zimo megumbo..
Otaku fekelwa okapalwa hoka kwali ka kwata omalapi go kombete hoka kwali kwa lala oohanona ndhoka, nokufika ondunda.
Aakwanambwiyu oya fumvikwa nena. Vkaapanda@nepc.com.na