Hilma Nakanduungile

Oshamono – Omanga yamwe yomaagundjuka taya ipopile kutya kaye na iikwaniipangitho ya gwana po, ya tameke okunyangadhala pangeshefa, omunamimvo (26) gwedhina Shangelao Hauwanga momukunda Oshamono moshikandjohogololo shaPembe mOhangwena okwe ya tsu omukumo opo ya tameke okunyangadhala naashoka ye na po, mpoka ye li.

Hauwanga ngoka a yambukile momukunda Etsapa nongashingeyi oku li omukalimo gwomOshamono, oye gumwe gwomaagundjuka mboka taya nyangadhala nuudhiginini opo ya tule omboloto poshitaafula, okupitila moshikunino she.

Pethimbo a talelwa po koshikundaneki shino, Hauwanga okwa hokolola kutya  okwa li a tameke eilongo lye koUnivesiti yaNamibia, ashike sho inee shi enditha nawa momvula ye yotango, oshe etitha opo ekwatho lyopashimaliwa ndyoka a li a pewa e li kuthwe pakathimbo. Molwashoka kapwa li we ngoka ta vulu oku mu futila a endulule iilongwa ye, onkalo oye mu thiminike a galukile kegumbo. 

Hauwanga okwa hokolola kutya, momumvo 2020 okwa tokola kutya pehala lyokweendaenda nokukala a kalela oondingosho, oshihwepo a ninge oshikunino she pegumbo, moka a kunu mo omatama niikwamboga. 

“Eshongo enene nda li ndi na olyo ompumbwe yomeya gokutekela iikunomwa yandje. Oge li kokule noonkondo, ishewe kaga li ga gwana molwashoka omo wo hamu nu iimuna. Lwanima onda kundana kutya mOshamono omu na ondama yomeya, nondi indile mwene gwomukunda opo a kwathele ndje ehala popepi nondama, ndi  ninge opoloyeka yandje, nokwe li pendje mo2023,” Hauwanga ta ti.

Ta hokolola kutya nonando a li a pandula kehala, okwa kala a palamena omashongo okuziilila kuyamwe yomaakwashigwana.

“Sho opo nde ya po mpaka onda li handi yolwa noku ulwa kutya kandi li nawa momutse, sho tandi tutu omeya komutse. Molwashoka pehala mpoka nda pewa ope na efululu noonkondo, yamwe po yomaakwashigwana oya kala nokuyola ndje. 

Oya kambadhala wo okushololitha ndje kutya otandi hepeke ashike oonkondo dhandje,” Hauwanga ta ti ngaaka.

Ta gwedha ko kutya nonando a kala nokuningilwa ayihe mbyoka, ina sa uunye, molwashoka okwi itaala kutya ke na okutegele a gwanithe po ayihe ta pumbwa opo a tameke ongeshefa. 

“Omakwatho onde ga kongo nda tameka nale oshikunino shandje, mono nda pula ehangano lyoFood and Agriculture of the United Nations melongelokumwe noEmbasy   yaJapan, noya yambidhidha ndje niikwathitho oyindji ngaashi oosola panela, ominino dhokukutha nomeya mondama oku eta moshikunino, oombuto nayilwe. 

Mboka ya li haya yolo ndje osho ya gu mo, molwashoka inandi sholola ngaashi ya li ya tegelela,” Hauwanga ta ti ngaaka.

Ta gwedha ko kutya oshigwana shomomudhingoloko ohashi mu yambidhidha lela, nokuli ethimbo limwe ohi iyadha itaa tsakanitha omambestelo gawo, molwashoka oyendji.

Nonando a yambidhidhwa nomakwatho gongushu yi vule N$ 40 000 koFood and Agriculture   Organisation of the United Nations melongelokumwe noEmbasy   yaJapan, natango okwa pumbwa omakwatho ngaashi: ondoloma yokutula omeya poshikunino, ondhalate yoshipa okugamena iikunomwa ye, nayilwe.

Pethimbo a talelwa po kosheendo okuziilila koFood and Agriculture   Organisation of the United Nations melongelokumwe noEmbasy   yaJapan, Hauwanga okwa pandula komakwatho a pewa, nokwa koleke kutya oge eta mo elunduluko enene mopoloyeka ye.

Omukaleliposhilongo gwaJapan moNamibia, Hisao Nishimaki ngoka a li a talele po oopoloyeka ndhoka ya yambidhidha moshitopolwa okwa mbekulwa kiilonga yuupendafule nokomukumo gwaHauwanga. 

“Ehokololo lyoye otali tsu oyendji omukumo.  Iilonga yoye wo otayi holola kutya omakwatho twe ku pe oga hepuluka, onkene tsikila nokulonga nuudhiginini,” Nishimaki ta ti ngaaka.

Hauwanga ota ti, oku na ondjuulukwe yokushuna koskola a ka mane eilongo lye, onkene ota longo nuudhiginini a gwanithe oshimaliwa ta pumbwa. 

Ta gwedha ko kutya opoloyeka ye oya ninga elunduluko enene monkalamwenyo ye mwene, aakwanezimo nosho wo omudhingoloko moka ta nyangadhalele.