Lasarus Hakwaake
EENHANA – Omunangeshefa Helaria Sheehama woTangeni Tailoring mododolopa Helao Nafidi moshitukulwa Ohangwena okwa yandja oshali oulapi woku tuvika komayulu nokokanya veli 200 koshitopolwa Ohangwena opo ku kelelwe oCOVID-19. Oilongifo ei oya tambulwako komunashipundi welelo loshitukulwa Ohangwena Erickson Ndawanifa ponhele yaNgoloneya Walde Ndevashiya.
Eshi a tambulako omakwafo aa Ndawanifa okwa ti oilongifomwa ei otai ka tukulilwa ovanhu ovo veli momumbwe moshitukulwa. Okwa pa ndula tau pu mo ewiliko loTangeni Tailoring eshi la shakaneka epangelo ondjila-kati moku lwifa oCOVID-19.
Ndawanifa okwa pula ovanangeshefa, omahangano opaumwene oshoyo ovanhu pouhandimwe va kufe ko oshiholelwa shoku shunifila koshiwana pefimbo eli opo ku kale kwa kambamwa omashongo a etwa koCOVID-19.