OKANGHUDI – Omukulupe weedula 75, pamwe novaneumbo laye ove li monghuwo i na onghambe, tava longelwa omunyonena koshiluli osho sha xwika po nokaanda koilya.
Meekulu Fransina Ndipwashimwe womomukunda Okanghudi moshitukulwa shaHangwena, okwa hokolola ta ti oshiluli osha xwika po yoo vali omidjalo dofikola dounona nomambo ofikola avo.
Okwa hokolola ta ti oshiluli osha tameka momwedi Maalisa ashike fiyo opaife onghee ngaa tashi twikile nokutyatyaleka.
“Ihatu kofa vali, efimbo keshe otwa tila ngeenge tu li meumbo. Katu na oikulya noidjalomwa molwaashi otwa fiwa pomutenya koshiluli,” ta hokolola.
Okwa ti oshiluli ohashi kala tashi popi ondaka yomutekulu waye tashi ti kutya osha hala okuhanaunapo eumbo alishe.
“Ngeenge onda nyaneke oilya pondje ohai fufilwa omadu koshiluli. Inandi mona nale oshiluli sha pota sha fa eshi,” ta ti.
Okwa hokolola ta ti oshiluli ohashi landula omutekulu waye oo e li mondodo onhihamano kofikola Onamahoka Combined School.
“Omutekulu wange paife okwa dja mo mofikola. Onde mu twala kOmuthiya opo a ka fude po okuhepekwa koshiluli ashike ota shuna mofikola modula tai ya,” ta ti.
Omuhongifikola pofikola Onamahoka Combined School, okwa hokolola ta ti omunafikola Sheefeni oha shange ashike oinyangadalwa yaye meembapila molwaashi omambo aye okwa xwikwa po koshiluli.
“Ngeenge otwe mu pe embo lipe ndele ta i nalo keumbo iha aluka nalo. Sheefeni ohe tu lombwele kutya omambo aye okwa xwikwa po koshiluli,” ta ti.
Okwa hokolola ta ti efiku limwe manga ve li motundi tava lesha ounamambo, ova mona ashike okambo oko kwa li ke kwetwe kuSheefani ka wila pedu.
“Sheefeni okwa li e lipyakidila ta lesha. Okwe tu lombwela kutya okwa nyekwa okambo koshiluli, ta ti kutya oku wete oshiluli shi li mongulufikola ashike fye inatu shi mona,” ta ti.
Okwa ti okudja opo okwa shivifila omukulunhufikola shaashi okwa li a tila oshiluli shi li mongulufikola tashi nyeke ko okambo.
Andreas Philipus naye ha di meumbo omo noku li mondodo 11 pofikola tuu opo, okwa hokolola ta ti oha ningilwa omatilifo koshiluli tashi ti otashi mu dipaa.
“Oshiluli osha lombwela nge yoo vali kutya otashi xwike po omambo ange ofikola. Ohandi udu ashike ondaka tai popi ashike ihandi mono omunhu,” ta ti.
Okwa ti oshiluli otashi piyaaneke elihongo laye molwaashi paife iha kala vali a manguluka ngeenge e li kofikola.
“Nonande oshiluli sha xwika po omambo ange itandi di mo mofikola molwaashi onda hala okumana ofikola,” ta ti.
fhamalwa@nepc.com.na