Auleria Wakudumo 

Minista woikwameni neameno lokeengaba Lucia Iipumbu okwa holola kutya ombelewa yoikwameni koWindhoek otai ka hovela okuyakula oshiwana pefimbo lomusha. 

Ouministeli owa kufa etokolo eli, konima eshi oshiwana sha holola eudonai eshi vati sha tewatewa mombelewa yoikwameni po13h00 fiyo 14h00 shaashi vati ovanambelewa tava i komusha pomusha. 

“Otwa uda omakemo oshiwana kombinga yoshinima eshi, nonghene ouministeli owa tokola opo ovanambelewa va kale tava yakulafana nopefimbo lomusha,” Minista ta holola. Minista okwa ti eshi otashi kwafele okuyakula oshiwana nondjungu, pefimbo nokukeelela omikweyo dile pombelewa. Otaku hokololwa ovanambelewa mombelewa yoikwameni va lombwela ovakwashiwana ovo va li va endela omayakulo kutya nava ye pondje okudja po13h00 fiyo opo14h00 shaashi vati tava i komusha omwedi wa dja ko. 

Mokavidio oko ka li ka andjakana komalungula unene koFacebook noTik-Tok taka ulike ovanhu eshi ve li pondje yombelewa naashi tava shuna mombelewa po14h00 eshi ovanambelewa va aluka. 

Minista okwa kwashilipaleka kutya okwa yandja elombwelo komukulunhuwiliki mouministeli opo a ninge omalunduluko okuyakulafana pefimbo lomusha. -wakudumoauleria@gmail.com