Auleria Wakudumo
Omupopiliko wopolifi, Deputy Commissioner Kauna Shikwambi okwa holola ta ti opolifi oya mona eelopota dihapu okudja koohandimwe va ninga oihakanwa yekengelelo konima eshi va mona omatumwalaka komalungula okupitila momukalo woe-mail tau holola vati kutya omunhu okwa fyuulula, mwa kwatelwa yoo okakalata kombaanga.
“Okwa didilikwa kutya ovakengeleli otava longo paife momukalo ou. Ohava kwatafana noonakuningwa oihakanwa koemail oshoyo koWhatsApp, tava fatulula kutya omunhu okwa hoololwa a fyuulule nakufya wokondje yoshilongo.
Oukalata vahapu va longifwa otava ulike voko Hong Kong naShanghai Banking Corporation Limited (HSBC),” Shikwambi ta ti.
Shikwambi okwa ti oukalata vati ohava tumwa vehena onomola yokukufako oshimaliwa nanakutuminwa okakalata oha pulwa a tume oshimaliwa shonhumba kombaanga yokodje yoshilongo opo vati a dule okumona osho a fyuulula.
Konima vati oshimaliwa sha tumwa, ohava twikile nokupula okupula oshimaliwa fiyo omunhu ta loloka okutuma oshimaliwa nokonima tava tete ko ekwatafano pokati kavo.
Oshiwana otashi kunghililwa shi amene omauyelele okulongifa okumona omakwafo ombaanga komalungula oshoyo londwela shi kale sha kotoka osheshi okalyamupombo ohava lundulula omikalo davo dokulila oshiwana.
“Onghene oshiwana otashi indilwa opo shiha nyamukule ile shi kufe ombinga mee e-mail, WhatsApp oshoyo okupopya meengodi taku feekelwa oko haku twala fiyo osheshi omunhu taka yandja ouyelele waye wokombaanga,” Shikwambi ta ti.
Okwa indila yoo ovo va ninga oihakanwa va kwatafane nomukulunhu wokukonaakono oimbuluma, Deputy Commissioner Kaura ko 0812436482.