Auleria Wakudumo
Omanga opolifi yaShana oya ti ekondjifo loimbuluma, netakamifo lovakayulinyanga, ola ninga eshongo linene molwaashi kave na eenhele da wana modolongo.
Eenhele poitaasi yopolifi vati oda fa ofenya nosha ninga shidjuu okuweda mo ovakayulinyanga vamwe shaashi ovanadolongo ovo veli mo ova pitilila nale pwaavo va ufwa va kale mo.
Omukulunhu wopolifi moshitukulwa shaShana Commissioner Naftal Lungameni Sakaria okwa ti kutya opolifi ohai li hange tai yeleke oibuluma ovafekelwa ovo va pewa veli futile mo komhangu ndele itava dulu okufuta osho va pewa.
“Ohatu va pula kutya otava dulu okufuta ingapi, ngeenge okwa ti nande okuna ashike N$500, fyee hatu ka pula omupanguli a shunife oshimaliwa shelifutile mo pedu, opo a dule okulifutila mo nokuya keumbo,” Sakaria ta ti.
Sakaria opolifi oya kwatele ovanhu 16 koShoopala, vehena oufemba, tave djako, ashike oshali shi djuu okuungaunga navo shaasho eecela dopolifi odi yadi. Ovanhu ava okwali ashike va lombwelwa op ova ete omaufemba avo.
“Onda lopotelwa kutya vahapu ova alukile nomaufemba avo ashike umwe ina aluka fiyo opaife,” Sakaria ta ti.
Sakaria okwa ti vati shaashi eecela oda yada, ovanhu vamwe ohava nangala momikala do dolongo.
“Ohava pewa ashike outalashe vavo, ndele tava nangala momukala,” Sakaria ta yelifa.
Kombinga yoikulya, Sakaria okwati kapena naana oudjuu shaashi vati ohava pula ashike oikulya ya wana ovanhu.
“Ashike ngeenge ova mbestele oikulya yovanhu 200 ndele vahapu tava hangwa va djamo, nena otava mono oikulya ihapu. Ngeenge momwaalu omwa wedwa vahapu, nena oikulya ohai ningi ishona,” Sakaria ta yelifa.
Kakukutu komatanga opolifi yaNamibia Inspector General Joseph Shikongo naye okwa holola mafiku aa kutya ovanhu veli mefiloshisho lopolifi poitaasi ya yooloka ova hapupala moshilongo ashishe.
Okwati oshitaasi ngaashi Wanaheda Police Cells, osho shali hashi kala ashike ovanhu 200 noshitaasi Katima Mulilo Police Cells sha longwa ngeno shi kale ovanhu 80, paife oshina ovanhu 300.
Sakaria okwa kumaida ovakwanedimo nookaume kaavo neli moitaasi yopolifi op ova talele po ovaholike vavo.
“Nava etele ovaholike vavo oikulya oshoyo oindjalomwa,” Sakaria ta ti.