Auleria Wakudumo

Mounyuni omo vahapu inava kala va manguluka okupopya omaudjuu nomashongo e va taalela, Victoria Shamhe (47), omunyoli womambo nomunangeshefa ota tu omukumo ovo va taalela omashongo, te shi ningi okupitila mokushanga omambo. 

Membo loshipalanyole ‘Endure suffering as a good soldier’ osho sha hala okutya lididimikila omashongo, Shamhe okwa holola aishe oyo a pitila muyo. Okudja kokukanifa ovaholike vaye, okukengelelwa, ouyehame, ouhafikepamwe moilonga osho yo omalwoodi opamhepo. 

Nonande a pitila momashongo aa, amwe nokuli oto ti itashi dulika, okwa ti okwe lilonga kutya okumona oixuna itashi ti Kalunga okwe ku handukila, ndele eshi ohashi ningwa oku ku pyokola kwaashi sha landula ko. 

“Onda pita momashongo oo amwe e lipulifa nge kutya oshike omupya u na okukala wa shikula nge keshe apa handi i. Ashike nande ongaho, keshe efimbo omutondi a hala okuhanaunange po, Kalunga oha amene nge. Oule wefimbo, onda didilika kutya omashongo nda pitila muo okwa li taa longekidile nge eshi shi li komesho,” Shamhe ta holola ngaho. 

Kombada yokambo, oku na etumwalaka tali tu ovanhu omukumo kutya omaudjuu onghalamwenyo inaa nuninwa oku tu teya po. Ngaashi ashike omukwaita ha deulilwa okuya momashongo, ovaitaveli navo ohava nghonopalekwa okupitila momashongo. 

“Eshi nda hovela okushanga, ope na oikando imwe kwa li handi mwena po manga ndele handi tu eengolo koshipala shaPamba nomahodi taa pololoka,” ta dimbuluka ngaho.

Embo eli ola nhuninwa keshe ou a fa e wete onghalamwenyo ye mu mbatekenena po, ta pitile momashongo madjuu nakeshe oo e wete ina lalakanena sha monghalamwenyo. 

Shamhe okwa ti embo otali piti mo28 Febuluali 2026. 

Mokushanga embo eli, Shamhe ota kumaida ovanhu aveshe unene ovaitaveli ovo va taalela omashongo opamhepo ile opaumwene, ovaleli ovo va humbata omitengi didjuu, keshe ou a fa e wete a ekelwashi nokwa ngwangwana kutya kape na shidjuu ihaa xulu. 

– awakudumo@nepc.com.na