OHAKWEENYANGA – Ngoka kwali ha kala konima yomukokoli presidente Sam Nujoma, Nepando Amupanda esiku lyoshituthihupulitho shomukuluntu gwetanga lyegameno kwali Salomon “Jesus” Hawala shoka sha longekidhwa kaakwanezimo okwa popi kutya Hawala otayi megulu omolwa omauwanawa a longele oshilongo.
Oshituthidhimbuluko shaa kwanezimo shaHawala osha ningwa Etiyali pegumbo lye koHakweenyanga kOngwediva.
Nepando okwa popi kutya nonando pwa kala yamwe taya popi nayi kombinga yaHawala, yo itaya dhimbwa shoka a longele oshilongo.
“Natu thigululeni ombepo yaHawala, oshoka omulumentu ngoka okwali ependa, iha thigi emanya lyalonda ke kwawo,” ta popi ngaaka.
Ta ti, ngele ta ku popiwa omapendafule otaku popiwa aalumentu ngaashi Hawala, oshoka oya kondjela nokumangulula oshilongo.
Oshilyo kwali shoPLAN Combatants Association Mwiya Nelindi, okwa ti Hawala ota kala ependafule sigo aluhe.
“Nonando taya popi nayi kombinga yaHawala, kena esiku a dhimbiwe, oshoka iilonga a longa oya eta emanguluko lyoshilongo shika,” ta ti ngaaka.
Omukuluntu gwetanga lyegameno Martin Kambulu Penehas, okwa ti Hawala okwa thigi ko ondjokonona yiilonga yuupendafule gwe ndjoka itaayi dhimbiwa nande.
“Ethimbo lye a longela oshilongo shika olya ulike ohole ena naNamibia. Otwa tu mu dhimbulukwa sigo aluhe se ita tu mudhimbwa nando,” ta ti ngaaka.
Omukukadhi gweLaimi Hawala mondjokonona ye okwa ti ina kanitha ashike omusamane gwe ihe okwa kanitha kuume ke oshowo omukwathi gwe.
“Omusamane gwandje okwali e na eitaalo lya kola, okwa kala ena oshisho nohole nezimo lye, onkalo ye ombwaanawa oya kala yetu kwatakanitha kumwe nokutulonga nkene ye na okwiihumbata monkalamwenyo,” ta ti ngaaka.
Uunona waHawala owa dhimbulukwa wo he onga omulumentu gomwenyo omwanawa ye omumweni.
Hawala, okwa hulitha momasiku 11 gaAguste nuumvo, omasiku ashike gahetatu a gwanithe omimvo 90. Otaka fumbikwa momasiku gahamano gaSepetemba nuumvo.
Okwa thigi ko aanona ye yahamano nomukulukadhi gwe.