OTJOMUISE- Ombara Otjitambiona, Tumbee Tjombe, ndinondi otjimazu muno okuyenda kondua ye ya Tjozohungu kouye wa Tjombinde okuvarikiza.
Eye mayata Ohanunÿera otjo tjitjiri otjirongo tjourengowona we ape pumahikiza okaruveze okatiti okuyandjera omba mbuvekurira, mbuvanjanda pamue nokuungura pamue oruvze rokumupa ondjozikiro oseinina.
Ovimbumba maviundjirua okuundjira orutjindo rombara Tjombe ponduezu nokumuwondjoza okumuhitisa motjihuro eye pumakatanauka pokomando yeari rotjiserandu mEpako pumape kakara ozombinika ngundaa aihiya kapita mouyenda we ouseinina kOtjozohungu.
Tjavaza ndinondi mOtjozohungu omayakurua novitjitua viombazu viozombimbi nozondoro nu ape nao moine yomapeta otjiungura tjomayandjero wondjozikiro atjiutu nongumbiro kehi yomuhonge wombongo ya Africa. Tjazumba ape kongorere omuniomuvanda okuyakura oviwaøa momuvanda we. Kuye aku kongorere Orata yOkarukondua kOmatoorore ka Tjombinÿe, Karii Marenga tjazumba akuhondjo ozombinika okuza motjiwana nganduu ngurova.
Muhuka otjiungura matjiutu momuviu natjihingi eyuva arihe indo nganduu momorongo wongurova. Movitjitua vieyuva muna omakaviriro woukambe, ombinika yOngooneya ya Maheke poo omukuramenepo we, ovira vioporotika, ovanane vomarapi, ovanane vombazu, omapanga novatjiwasane nomakura notjiwana. Tjandje wina oukambe, onÿerera, ombimbi nondoro opuiiri.
Osondaha okuza mohambombari yomuhokomunene omayaneno, ongumbiro nembo okuza morukarorua tjazumba apeya oinhe noina nu momasa womurongo naimue yomuhuka ovimmbumba avitinyauka okukotoka kOtjomuise.
Omandaha otjiungura tjondjozikiro oseinina atjikayenda komurungu pokomando yerapi rOtjiserandu mOkatutura ngurova puma petekerua ovira vioporitika, Oritjavari arire omarapi nOritjatatu arire omayandjero wondjozikiro omanene kehi yOmbongo ya Africa oyo ndjari ombongo yomuyaruke Tjombe. Oritjaine otjipena Otjitiro Otjindjandja. Oritjatano momasa womiviu womuhuka ovimbumba otjimavindjirire kOkahandja.
Ngunda aperi nao Ombara Onene yOvharero ya Tjozondjupa yonganda yOnguatjindu, Uaakutjo Kambazembi, Osondaha otjimasuvisiwa pOndundu ya Tjozondjupa. Eye erero otjasekamene okuza mOshakati ka kakawira. Ndino otjiungura tjondjozikiro otjimatjiutu nganduu kOsondaha tjimakasuvisiwa. Omuyaruke Ombara Uaakutjo Kambazembi ombara oitja hamboumue momakuruhungi yOnguatjindu okuutira kombara Kambazembi imuini nguaayandja ongombe nodnjupa komukapite, kuye kukuakongorera Ombara Kombamba , Ombara Maveipi, Ombara Hijatjiti, Ombara David Tuvahi kukuee kukongorera Ombara Kutjo okuza mo 2007.