Eveline de Klerks
TSOAXUBAMS-Tsoaxubams di !Ā!khōmais ǀAwemā!nans ge ǁîs ai kai marisa 2017/18ǁî marikurib !nâ ge ǂnûiǂui, ǀasa ǁanǁguigu ǂnuwis, !hūba omkhâis tsî !hū!âde !anu!anu tsî ǂhâbasa !gao!gao !oabade mās !aromas tsîna. ǀAwemā-aob Erriki Shitanab, aiǂnû-aob !khōdanas komites !ā!khōmais dis dib, ge !ā!khōmais di mariǂnûiǂuisab ge ai!â gere ǂoa Donertaxtsēs ai gere ǁgui-ai!â soab ai ge mî, N$99 miljuns nî ǀasa projekn !aroma sîsenūhesa, ǀawemā!nans di N$138 miljuns kai projekn disa xu. Nē ǀawemā!nans di tsēsa xu tsēs ǁga ûis di maris ge N$153 miljunsa !gau gese ra ǁgau. ǁKhātis ge N$38.7 miljunsa nî sîsenūhe î di projekdi hîa ge ǂoago marikurib !nâ dītoahe tama ide ai!gû-ūhe. !Aruǀîb ge Shitanaba ge mî, N$7.1 miljuns ǀasa ǁanǁguiga !anu!anus tsî ǂhâbasa !gao!gao !oabade mās !aroma nî sîsenūhesa tsî noxopa mâ sîsenǂuib ǀasa ǁanǁguigu a ǂâi!nâǁgui!nâsa !âgu !nâ a hâ ǁkhās di ôa!nâde dīs !aromas tsîna. N$11.5 miljuns ge ǀasa !gâi!gâisen!khaina Moles tawa hā-ūs tsî jettib ǂnamipe ôa!nâde dīs tsî ǀhûhâsigu !aroma hâ hoa!nâ-aixa !khain tsî ǂgamǂgamsenǀhurun di !khaiga !gâi!gâi!nâs !aroma. ǁKhātis ge N$18 miljunsa a ǀaweǁguibasa ǁkhawa !gâi!gâi!nâs daogu tsî !gangu dis !aroma. ǀAwemā!nans ge daogu tsî !gangu !nās !aroma ǂhâbasa xūna ge ǁamatoa tsî kuru-aona ǀnai ge ǁgaumâi nē sîsenna nî dītoase. Ai!âs ge ǀawemā!nansa N$18.7 miljunsa ge mā îs ǂKhari-tsî-ǁAeguǀnōb ǂharugu!khaiba dītoahe hîa nî ǀasa !ēde aitsama ra ǂharuguba tsoatsoa ǂharugu-aona nāse. N$18.8 miljuns ge !gâi!gâi!nâs tsî omkhâis ǂkhari-omn !oabadi dis, Tsoaxubams !nâs !aroma a ǀaweǁguisa. N$700 000 ge !ā!khōmai-aos di autosa !khō!khunis !aroma ǀaweǁguisa tsî N$665 00 nau ǂhâbasa xūn !aroma a ǂhâbasase, ǁanǂgāsaben Tsoaxubams dina ǂâuǀoa hâ !oabade mās !nâ ra sîsenūhena. Shitanib ge ge mî, nēti ī mariǂnûiǂuis ra dībahe !khais ge ǁanǂgāsaben !aroma !oabade !gâi!gâi!nâs tsî !gâi ǀgaub !nâ xūna !khōǀgaras tsîn !aromasa. “Tsoaxubams ge !narisarima-aon di ǁhôasa tsî ǁnā-amaga kaise a ǂhâbasa !oabadi nî ǀgapiǀgauxa tsî nēs !nâ-ū sâuǁkhāsiba omkhâisa.”