Omukulunhuwiliki wehongo moshitukulwa shaShikoto Hilma Nuunyango- George okwa pula onhele yedu kelelo lodoolopa yaTsumeb nelalakano lokutunga po eefikola mbali shaashi omwaalu wovanafikola owa ninga muhapu modoolopa. 

Nuunyango-George okwa li a ninga eenghundafana nelelo lodoolopa yaTsumeb nelalakano lokukundafana kombinga yomukunda ou. Okwa ti unene tuu eeprimafikola odo da didilikwa dihadi ovanafikola va finanamo mongulu. Okwa weda po ta ti eesekundofikola odo dina omihandjo nando odihadi ovanafikola shaashi hadi fikola ovanafikola hava di kondje yodoolopa tava kongo omuhandjo. “Otashi kwafele ngeenge otwa dungu oprimafikola imwe shaashi otashi kandula po omukundu wovanafikola ve lifinaneka mo mongulu.Otaku hokololwa kutya ongulufikola imwe oto hange mo muna ovanafikola 40, va finanamo. 

Modoolopa yaTsumeb omuna eefikola 15, eeprimafikola odi li omuwoi, ombanga eesekundofikola odi li nhatu. 

Eefikola dopaumwene di li moTsumeb odi li mbali ashike ohadi longifwa kovadali ovo tava dulu okufuta ondado i li pombada. 

Otaku hokololwa kutya moTsumeb omu na ovanafikola ve dulife o10 000. 

Okwa ti naashi otashi ulike kutya omwaalu wovanafikola owa londa wa uka pombada novapumba eengulufikola da weda po. Omukulunhuwiliki okwa ti ombelewa yaye oya faneka opo i kale ya tunga oprimafikola imwe osho yo osekundufikola imwe momudo 2027. 

“Eshi otashi ningwa ngeenge otwa pewa onhele yedu. Eefikola edi mbali natango ota di ka tungwa shelikolela koshimaliwa hatu ka pewa koministeli,” ta ti. 

Pefimbo lomutunba, omupopiliko wamuni waTsumeb, Stella Imalwa okwa ti muni wavo ota twikile okulongela kumwe noshikondo shehongo moshitukulwa shavo. 

“Muni ota kwafele ndele ta tale kutya onhele ili pi tai wapalele okutunga eefikola,” ta ti. Okwa yelifa ta ti muni okwa faneka opo a kale a kundula po omukundu wefikola dihadi ovanafikola tashi pitile mokuyandjaneka edu. Okwa ti omwaalu wovakalimo wodoolopa otau ende wa londa efiku keshe efiku molwashi oshiwana otashi ya kodoolopa okukonga oxupilo. 

Okwa yelifa ta ti omudo 2022 omwaalu wovanhu ve li moTsumeb okwa li 19275 omanga omudo 2023 wovanhu okwa li u li 34960. 

Imalwa okwa ti muni wavo ota twikile okuyandjaneka omayakulo koshiwana. 

Maano Hangula omukalimo womodoolopa woTsumeb okwa ti onghalo yeefikola ina di wana modoolopa yavo oya eta ovadali va mono oixumo yokukongela ounona ofikola.“Oha shi kala shidjuu ketameko lodula ngeenge hatu kongele ounona vetu eefikola unene tuu meendodo petameko,” ta ti. Okwa ti pandula ombelewa yomukulunhuwiliki wehongo eshi tai ka longela kumwe nelelo lodoolopa okuyandjaneka onhele yedu yokutunga eefikola. 

fhamalwa@nepc.com.na