Victoria Kaapanda
Omalelo gopamuthigululwakalo gamwe konooli oga kaleke manga iihokolola nosho wo iinyangadhalwa ayihe yopamithigululwakalo, opo ga kuthe okafudho kokunwa ongongola.
Omalelo ngoka ga yi manga mokafudho ongaashi elelo lyaUkwanyama, elelo lyUukwambi oshowo elelo lyaMbalantu. Aaleli mbaka oya ti itaya ka pitika nande iihokolola ethimbo ndika lyomagongo.
Ihokolola oya kalekwa manga pakathimbo, okuza ohela, esiku 01 lyaMalitsa sigo 01 lyaApilili nuumvo.
Omunashipundi melelo lyopamuthigululwakalo lyaUkwanyama Elias Uaandja okwa ti, ethimbo ndika oha li simanekwa onkene oshigwana ohashi pewa ompito opo shi nwe omagongo nawa, sha manguluka.
“Otwa landula omuthigululwakalo ngoka gwa kala po nale kutya aantu ihaya pangulwa omanga ye li kohi yiikolitha,” ta popi ngaaka.
Elenga enene lyUukwambi Herman Ndilimani Iipumbu okwa ti, omagongo ogo ashike omalovu ga kala ko okuza nale, onkene oga tali ka ko gasimana moshilongo. “Ethimbo ndika lyomagongo aantu ohaya indikwa okueenda niilwitho ngaashi, oondhimbo, oombele omakatana nosho tuu, okuyanda okwi imonithathana iiponga, oshoka oyendji omandhilandhilo gawo ohaga kala ga nkundipalekwa komagongo,” ta fatulula ngaaka.
Iipumbu okwa ti, oompangu ohadhi kalekwa netompelo ndyoka kutya, oshigwana ohashi kala tashi nu omagongo ethimbo ndika, onkene ngele okuna iihokolola otashi vulika yaka ya mukule omayamukulo kaageli mondjila omolwa omalovu ngoka ya nwa.
“Onkene ohaga kalekwa ethimbo ndyoka okugandja ompito koshigwana shi nwe omagongo gasho sha manguluka,” ta ti ngaaka.
Omupopiliko melelo lyopamuthigululwakalo lyOmbalantu Isdor Angula Kanelombe naye okwa koleke kutya ka kuna iihokolola KOmbalantu omolwa ompito hayi gandjwa koshigwana shi new ongongola.
“Ethimbo ndika aantu ohaya ende ashike nomagumbo, taya nu kehe mpoka pe na omagongo,” ta ti ngaaka. Kanolembe naye okwa ti, ethimbo ndyoka oshigwana inashi pitika oku enda niilwitho.
Ashike omupopiliko gwelelo lyaNdonga Frans Enkali okwa ti, mOndonga kamu na okafudho komagongo, omuthigululwakalo ngoka itagu tsathana we nethimbo lyopaife.
Ta ti nale omagongo ogo ageke konyala ga li ko oshikolitha, ashike ngashi ngeyi iikolitha oya ninga ya kehe esiku. Ta ti omuthigululwakalo ngoka itagu vulu we oku landulwa.
“Ehumo komeho ota li ende lyuuka komeho, onkene ethimbo ndika aantu ohaya pangulwa sha ikolela komasiku ngoka ya nyolelwa,” ta fatulula ngaaka. Ta ti, ngele owa kaleke iihokolola mbyoka otayi ndumbala, ihe ito keyi vula we, ito yi mana mbala. – vkaapanda@nepc.com.na