Auleria Wakudumo
Ovanahambo, novakwashiwana pomikunda da dingilila Okashana Kuukongo waNehale va waiminwa kovanaimuna vandja keenhele da yooloka monooli ova yandja omakemo avo kombelewa yaNgoloneya waShikoto mOmuthiya onghela va uda nai keedalate doohandimwe tadi kambe ko Okashana, vati va pewa epitikilo kelelo laNdonga.
Onghela, ovanahambo vadja momikunda di dulu po10 da dingilila Okashana ova nyanya okudja Komutsegobahe fiyo okOmuthiya novashaina veli omhinge needalate da tavakana Okashana kUukongo waNehale mOndonga. Ovanahambo ova tula oukuni kumwe konima eshi oohandimwe, vati veli unene ovanamadina va pewa eenhele konhele oyo vati ya kala ya talika ko oyo hai yandje ouxupilo woimuna mOndonga aishe unene pefimbo loshikukuta.
“Okashana oko ouxupilo wetu koo oko ashike ke lipo paife onga edu loulifilo tali xupifa oimuna monooli aishe,” Omupopiliko wovanahambo kOkashana Kuukongo waNehale, Selma Shihepo ta ti.
Ovakulukadi vamwe pomudingonoko ovati mOkashana omo hava xupile mokupweya eeshe voo tava landifa opo va xupe.
“Onghene ohatu pula Ngoloneya etu kwafe opo eedalate di djepo omanga omafiku 13 Septemba 2024 inaa fika. Ngeenge kapena ou te tu pwilikine, ohatu ka longifa eenghono okukufa po eendalate fye vene,” Shihepo ta ti.
Ovanahambo otava fininikwa vati va fiyepo eehambo davo opo paye eedalate doohandimwe.
Meenghundafana naKundana, omunashipundi wovanahambo, Krisian Indongo okwati okwa tewa
melelo lomukunda onga hamushanga womukunda Omutsegonime A shaashi a pula ouyelele
kombinga yeedalate odo tadi pewa edu ponhele youlifilo mOkashana.
“Onda tewa melelo lomukunda shaashi nda popila oshiwana eshi tashi monifwa oixuna,” Indongo ta ti.
Ovanahambo ovapopya kutya ova uda unene nai eshi omupopiliko wopaumwene, David Kambonde
a popya kutya ovanahambo vamwe ovakwanyama novakwambi ovo veya okukonga ouxupilo
woimuna yavo navamwe ovo veeta epiyaneko. “Oshapuka shaashi ame odalele yaNdonga, atushe
atunyenyeta kombinga yoshinima eshi Ovakwashiwana vopomudingonoko. Oshikando shimwe onda
hanga nokuli outana noikombo yange ya indililwa modalate nokuli,” Indongo ta ti.
“Eshi tashi udifa nai unene osheshi elelo taliti edu otali pewa keshe umwe mwa kwatelwa
ovakwashiwana vopomudingililo, ngeno eshi oshali oshili, omolwashike hatu tanguna? Eedalate
otwe di tala ndele omunhu umwe okuna nande eehecta 60-100, oshili ngoo mondjila osho,” umwe womovanahambo ta ti.
Omakwafo aaveshe
Ovanahambo ova ti paife eendungu, omifima, emboola de pangelo, oupale vokudanena etanga momukunda Omutsegombahe nOkakwena nomatemba okunwina oimuna oya tulwa meedalate.
Ovanahambo ova pula opolifi pomudingonoko wOkashana oshoyo Omuthiya i li dope moshiima opo oohandimwe ovo tava kufa ko vati edu loulifilo va ha twikile komesho voo va kufe po eedalate davo. Ova pula yoo ekwafo kuNgoloneya woshitukulwa shaShikoto, Penda Ya Ndakolo a longele kumwe noocouncilor voikandjohoololo ya yooloka moshitukulwa opo ve va kwafe moshinima eshi.
“Ohatu indile opolifi oshoyo omukwaniilwa ye mwene a kunde ovakwashiwana vaye noku uda ekemo lavo,” tava indile.
Omapungu
Ovanahambo ova ti kutya ope na nale onhele ya nhuninwa omapungu yepangelo vati ashike iha pa longwa sha vali.
“Onhele oyo oya nhuninwa omapungu okudja nale manga oshilongo inashi manguluka, ashike paife onhele oya landifwa po,” tava ngongota. Ovati kutya elelo nali twikile okulonga omapungu konhele ei vati iha i longifwa vali nokuli.
Ova twikila tava ti ovatila kutya ngeenge ouxupilo owa hanaunwa po ngaashi eendungu vati da tulwa
meedalate oshoyo omambakumbaku taa hanauna po onhele opo va tuleko eedalate, otava ka kala va kanifa shihapu.
Ovanahambo otava ti ngeenge ka pena ou teya okuvapopila fiyo omo 15 August 2024, otava ka hanaunapo eedalate odo da tavakana Okashana.
Ovanahambo ovati paife ova didilika kutya ovanahambo pamwe ova tewa po filufilu neenhele davo oda kufwako nokutulwa meedalate.