ONDANGWA – Oo a li nale omukulunhuwiliki wehongo moshitukulwa shaShikoto Aletta Eises okwa kumaida ovahongifikola novakulunhufikola opo va twikile okulonga nelitulemo.
Eises edi okwe di popya mexuliloshivike pefimbo kwa li ta lekele oshiwana koshivilohambelelo shaye shokuya mopendjela sho sha li kOndangwa. Ovakulunhufikola va dja keefikola da yooloka, novatalelishikandjohongo, mwa kwatelwa ovahongifikola ve li mopendjela okwa li va ngudumana okutyapula oshivilo hambelelo shomukulunhuwiliki wehongo. Eises okwa wilika oshikondo shehongo mOshikoto oule weedula heyali.
Okwa ti ka kwa li shipu kuya okuninga omukulunhuwi l iki wehongo mOshikoto molwashi okwe uya pefimbo lomukifi wo Covid-19 wa tukuka moNamibia. Okwa ti natango okwa li a taalela omashongo eendjila dii okuya keefikola noshoyo onghalo yokuhe na omeva keefikola.
“Ina ndi teka omukumo wokulonga noudinini opo ndi yambulapo oshikondo shehongo moshitukulwa,” ta ti.
Ovakulunhufikola va yooloka ova tanga Eises onga omunambili ehole elongelokumwe kumwe.
Eises oye umwe a tota po opolongalama yokuyandja ehongo nokudeula ovanafikola voumati nghene ve na okuliumbata.
Omadeulo aa oha ningwa omudo keshe omo ovanafikola voumati okudja keefikola da yooloka hava hangana.
Eises oye umwe a tota po natango opolongalama yokuyandja ouyelele nehongo kombinga yomaifano a yooloka.
Ombelewa yaye ohai ufana oiputudilo yopombada ya yooloka nelalakano lokuyandja ouyelele kombinga yomaifano oo ovanafikola ve na ohokwe ve ke li hongele.
Ovahongifikola ova tanga Eises onga omuleli e na eudeko kombinga yefimano lehongo molwashi okwa li alushe a fiki peefikola okupwilikina omashongo ovanafikola.
Omukulunhuwiliki wehongo Eises okwa kala e na ekwatafano liwa novatoolinghundana omo alushe kwa li ehole okuyandja ouyelele kombinga yoinyangadalwa tai ningwa keefikola ngaashi oikunino.
Eises okwa tameka okulonga ofikola momudo 1991.
Omudo 2000 fiyo 2005 okwa li omupedukulunhufikola.
Omudo 2006 fiyo 2012 okwa ninga omukulunhufikola.
Omudo 2013 fiyo 2018 okwa ulikwa a ninge omupedu kulunhuwiliki wehongo moshitukulwa shaHardap.
Ovanashilonga pamwe naEises ove mu tanga onga omukainhu a longo noudinini nokuyakula ovanhu shi fike pamwe pehe na omunhu ta ningilwa okatongo.
-fhamalwa@nepc.com.na