Udigu wa Kamarada Kapia hamutjanga gombunga zovadinkatu za SWAPO ogu vahagakesa pausupi yirugana namukwawo zendi silyo sontjima-ntjima zombunga zovadinkatu Ralph Blaauw, ngesi kuna kuzanye sika kare sinka soPolitical Bureau zoSWAPO kutunda tupu apa mbunga ozo zakona- kona udigu owo kazi geve yitundwamo kombunga ntjima-ntjima zepongo eli lyombunga zovadinkantu woSWAPO.New Era kayigwene asi nombunga nadinye mbali zontjima- ntjima nezi zopontambo zokuzeruka kaditambwire yitundwamo oyo ano mukwatelimo vadinkantu ava, Evelyn !Nawases-Taeyele kuna kumu ndindira agave yitundwamo eyi kwahamutjanga ntoni goSWAPO yipo vakaliyongeko mosigongi oso sakuwiza sopolitbiro. Kapia naBlaauw kwavahagekesa momusupi mwaSitarara 2005,mvhura ezi zina pu,kutunda tupu apa vavamona asi kwalihameseramo vene mono miliyuna N$30,edi dazire koAVID kwaninkisa vantu wovanzi vavahagekese yirugana siruwo oso ogu yatembepo nawa -nawa Lasarus Kandara galidipagere mwene age mekeverero lyovaporosi. Nampili ngomu asi yitundwamo eyi kava yiliyongere sinzi sovahameni kapi kavayiferere yiyo kavapwegemo sigongi sahana kupwa.Muntu ogu katu pere mbudi ezi katente asi muna sipundi gombunga konakoni Pohamba Shifeta karesere yitundwamo eyi kepongo lyautano lyontjima- ntjima zombunga ezi komeho vakayitambure ava kava kerepo.Yitundwamo kuna kulikida asi vanzi vana hamenemo unene nompitisili dovadinkantu yiyo kayivaninkisire vapwagemo mosigongi sahana kupwa.Apa katu paparere nkumbu Pohamba kapulire asi yousili yitundwamo kava yigeve nye kapi kamwene asi koveli kava dukiremo,morwa age kapwege paapa tupu kamene kugava yitundwamo oyo.Pohamba kapi kageve nampili nakauke asi yinke yina karamo age kalimbwilire tupu asi eyi yoSWAPO. Yitundwamo yina zere kwato umbondo nampili wongandi.Yina hupuko ngesi etokoro nye,nye etokoro olyo lyopolitbiro kapisi lyetu.Ose kwatu pere tupu tutare asi wolye vamwe woSWAPO vahamenenemo vazonagwise eruganeso ediveta lyoSWAPO. Mbunga zekonakono kwakaramo Pohamba,Lucia Iipumbu,Ambrosius Kandjii,Emma Molelekeng naSalomon Ilovu yiwo vatara asi ngapi zawizamo mbunga ezi zovadinkantu woSWAPO moAVID.Ntani vatare asi edina eli lyombunga zoSWAPO neli lyapresidente goSWAPO ngapi lyagenda vakalituremo,dogoro vakagwane nomiliyuna odo doko Social Security Commision.Simpe hena kwavapa asi vatare omu vayitura kumwe oJames nombunga ezi zovadinkantu woSWAPO. Apa katu paparere nkumbu navenye !Nawases Taeyele nahamutjanga gomapukururo Elia Ngurare kava nyokere kukumbururako.Ngurare katente asi pomuhowo vahepa kutanterako presidente, munona gwapresidente,hamutjanga ntoni nahamutjanga ntonigona,komeho vatantereko vantu wokulikarera.Awo ntaantani vazigide vana mbudi yipo vagave mbudi ezi zize kovantu navenye.