Siponga kasihorokere moutano wakapita pomukunda gwaOnderombapa kamukunda gona kakara momukunda horowero gwaAminius apa vantu vatunga momukunda gwina kavahomokerere mpitisili zopampo nononkwami dendi apa kavahere asi vakazegurure mberewa zawo nokukatulika erembe lyegeha.Konyara vantu wokusika ko500 vatunga moAminius kava homokerere mpitisili ezi zopa mpo Ewald Kazongominja ano age kakere tupu nononkwami dendi dina siki ko50 erago vaporosi kavagenderere kuwiza yiyo kayininkisire sihorokwa esi sihoroke namo peke. Nampili ngoso sihorokwa esi kasi kahagerere poopo mumati gonomvhura 25 kavamuroyere dogoro kufa.Mumati ogu kafire kava mudimbwilire asi yige Theboy Hiiho.Vantu kava kere nomagano gomadona paapa kavazuvhire asi Kazongominja ana yasiki age kakasikire moune kongurova negano asi ngano vakare nosilika sawo momapeu.Vatungi momukunda yipo kava simine ekero lyokusilika asi ngano ogu Kazongominja gahayapitapo apa natunda koGobabis kumwe nononkwami dendi rambangako nahompa Maharero apire kukasika koOnderombapa.Nkarapamwe kazifundire vantu owo yiyo kavatokwere kutengura koGobabis.Ano mokutengura kwawo yiyo kava ligwanekerere novaporosi ano vaporosi yiyo kavavaninkire asi vahepa kutengura vakatwikire nelikwamo lyawo.Nampili ngomu kava kere mekeverero lyovaporosi mbunga ezi kazi kere zina parapo asi kwato eyi nayihorokapo apa awo kava tamekere kuzuguma mamanya nokuzungururapo tende ezi kavatulirepo wankwa Kazongominja.Siponga tasihara kusika pontambo zondona moutano kongurova paapa gumwe govatungi kapwekeremo nokugwanekera nombunga ozo zina kara novaporosi asige mahauto gawo gatatu aga kavagendere nago. Mumatigona ogu Hiiho katundire mehauto eli kava genderere aligwenekere nombunga ezi vanakutjida.Mokukwama mukurona govaporosi momukunda Omaheke Pax Mwanawina nakufa ogu kava mutanterere vaporosi asi atengure kovakwawo.Mokuninka asi atengure sikutji kasitundire kooko kombunga zendi yiyo kasimukwete kumwe nokugwa pevhu.Mwanawina katente asi kapa kere tava litambagura mokuroya vaporosi novantu wopo mukunda nye sinzi soyikutji kayitundilire konkarapamwe,ano yovaporosi unene kavaroyere tupu meguru asi ngano vavatjilise.Sikutji esi kasitwarederer Hihoo aka fe.Sihorokwa kasitengwire apa kavazigiddre vakwayita vakapopere,awo yiyo kava dukire momapeu vaze oko kayihorokerere koOnderombapa. Kansela gomukunda horowero gwaAminius Erwin Uanguta,kava muzigidire aya kare mpita katji konombunga edi mbali.Nkarapamwe kaziperepo asi kapi nava pulisira elikwamo lyaKazongominja litwikire ano ava vakwawo asi elikwamo eli talitwikire.Nampili ngoso nkuruministera gona dokotora Libertina Amathila ogu kagwene mbudi ezi kwaBob Kandetu kahundilire wombunga zaKazongominja varundurure ezuva lyosilika sawo.Age simpe yiyo kavahundilire vaya mumone komberewa zendi ezuva lyokukwamako kumwe nahompa Maharero.Nampili ngomu asi vamwe ava vahamena kwaKazongominja kavapilire kuyitambura usimbu,Amathila kavahunmdilire asi ana hepa kumutanterako momunene yokuhamena elikwamo eli.Awo yiyo kavayitambwire asi tava rundurura ezuva eli,yipo asi novaporosi kapi navavapulisira vatwikire.Aron Kaevarua gomuhoko govaKavari ogu gakara asi hambara nkarapamwe zomoAminius mwendi azi tara katente asi vantu vendi kapi vana hafere eturo moyirugana lyaKazongominja ogu ana kara asi kapisi gomoAminius age gokoOtjinene. Kazongominja konyara kwakara tupu novantu wokusika ko20 moAminius eyi kuna kulilikida yene novantu hena kapi vanamuhara.Ame kuna kuyizuvha asi age kuna muhorowora wouhompa waMaharero nye morwa sinke nye ana kupiara kukakarera umpitisili wendi koOtjinene oku gatunda Maharero? Kavari katente asi age gatjanga mbapira zize koministeli ano uministeli yiyo wakalimburura asi elikwamo olyo lize tupu komeho morwa oyo vana kurugana kapi yina gumu uministeli wawo.Kaevarua katente asi vantu vendi kapi kavayihaferere omu kavavatekwire vaporosi.Age katente asi vaporosi kavauyungire asi nsene asi vantu womoAminius kuna kurugana ngwendi vaCaprivi ngano tavavazigidire vakwayita vaya vature monzira ure tupu wonovili mbali.Age simpe kahundilire asi vaporosi vahepa kuvatantera si yilye ana roya Hiiho ano age kuna kugazara asi vaporosi morwa sikutji esi kuna tundilire konyima zena kufa. Epangero kapi tali sininike muntu ogu vana pilire kuhara nkarapamwe nokutanta asi ngano tava yavatura monzira.Nampili ngomu vana pilire kutanta asi yinke vana kupira kutambura Kazongominja asi akare mpitisili gumwe kuvhura oyimone asi morwa age kwahamena koDTA.Morwa Aminius mukunda ogu ana kupangera NUDO kapisi hepero kuretamo DTA. Kwato ogu vana yikwatere yeroyango ndi asi yedipago apa tuna tura esanseko eli mosayitunga.Vaporosi ava kava kere posihorokwa sangesi kavatente asi awo kuna kukonakona vagwane simbangu vatare asi souta walye yipo vadive asi yilye ana dipaga muntu ogu ndi uta musinke vana mudipagesa.