Obrein Simasiku
Omuthiya – Nongendeseso dimwe kuna kudigopeka sirugana kokampani ezi vana kutumbura asi Atlkantis Logistics, kampani vapa sirugana sokutunga mambo gokusika ko 50 kondando zombiliha modoropa zaOmuthiya kupitira moNational Housing Enterprise (NHE) ngesi yirugana kuna sikama konyara yivike yitatu ngoso. Mokukwama mwaNHE, kupitira momugendesi kurona gomatjingiso nomagwanekero Eric Libongani, ogu ana kara asi kapi yina kumuhafesa kwayi varuganako dogoro ngesi, maudigu gamwe kwagaretesapo vagavi yimali ntani vatungi, eyi yaninkisa yirugana yisikame.
Kampani kazitente asi awo ngesi ntaantani vagusepo udigu ou, ano yirugana nayo yitameke. Apa nye tuna kuuyunga ngesi mambo ntntatu tupu ngana kara asi keguru tuna kutunga, gavali simpe pomakende tuna kugendera, 15 kuna tura tupu fondasi, ano age ntambali hawe kuna kuruga munoko, ano aga 18 kuna kombopo tupu. Yimo ana kutanta Libongani. Age kageve nonkango odo nkera paapa kakadingwire evango lina vana kudika mambo moOmuthiya. Ezi kuna kara projeka zomakwedi ntazimwe nampili ngomu tuna kara nomaudigu kwato kupitakana February 2019. Ose kapi tupu tuna hafa morwa yivike yitatu, melikwamo lyetungo nepu ezumbanesa nampili ezuva limwe ngoso owo udigu. Nye twahepa kuretapo nonkambadaro dimwe kovatungi nsene kapi vna kumana usimbu ndi asi nosiruwo, yimo ngoso ana kutanta Libongani. Age simpe katente asi mambo aga vana kutunga moOmuthiya kuna kara gompiliha unene kuhetakanesa nodoropa dimwe. Ago kuna tamekere po N$359, 000 nzugo zononkondwa mbali dokurara ano lyakahurako kuna kara N$484,000 olyo yilyo nye lyakahurako. Sitambo setu kuna kara asi twahepa kugava mambo gombiliha ntani nava ava gwana yimaliva yoyisesu vagagwane eyi tuna kumona asi yiwo vana hepa mambo momunene. Ame nina hafa morwa moOmuthiya tuna sikisamo sitambo setu omu tuna kutunga mambo gombiliha. Apa nye tuna kuuyunga asi gononkondo ose kuna tamba asi mambo gamwe kwagatungisa nodopi mbali ano gamwe zimwe tupu.Yiyo nye asi gonodopi mbali ndiro ano godopi zimwe mbiliha ntani nombanga nado kuna kugava makongo nampili kodopi zimwe muna tungisa. Ano nsene muna yasiki asi mbanga zinanyoka kugava yimaliva hawe ose vaNHE tuna liwapayikire mokugava yimaliwa oyo kogu ana hara kuranda embo olyo. Mambo aga tava gagava nye kukwama asi yilye ana yahowo yige gokuvhura kuvatera. Modoropa zaOmuthiya kuna karamu mahundiro gokusika ko1,418 vantu vana pumbwa mambo ngesi, vana kugandindira. Yimo ana kuyahulisa ngoso Libongani.