KEETMANSHOOP Ben Ulenga okwa hogololululwa ongomupresidende goCongress of Democrats (CoD) pokongressa yowina mpoka pwa li omakuyunguto mwa kwatelwa eiteeko moshigongi, eshunomo lyehogololo, omatukathano nomalundilathano ge nasha nekengelelo. Ulenga okwe shi pondola okushuna moshipundi shuupresidende wongundu sho a dhenge mo nomawi 155 Ignatius Shixwameni ngoka a mono omawi 141 medhingoloko etiyali lyomahogololo. Mehogololo lyotango Ulenga okwa mono omawi 114, Shixwameni okwa likola omawi 87, Nora-Schimming-Chase a zi mo nomawi 49, omanga omawi agehe kumwe 57 kwa li ga yonuuka. Okongressa oya tokola okuninga edhingoloko etiyali lyomahogololo omolwomuyalu omunene gomawi ga yonuuka. Medhingoloko etiyali Schimming-Chase okwiikutha mo methigathano ndika, naayambidhidhi ye oya gandja eyambidhidho lyawo kuShixwameni. Kakele shika inashi ka kwatha sha, naUlenga okwa yangata po oshipundi shuupresidende wongundu. Mokumona eyambidhidho okuza konyala kiitopolwa ine yopondingandinga muumbangalantu woshilongo ngaashi Omusati, Oshikoto shUumbangalantu, Ohangwena nOshana, oshowo Erongo, Kunene lyUumbangalantu oshowo yamwe okuza moKavango, Hardap, Khomas nOmaheke, Ulenga okwa kala aluhe e li pompito ombwanawa okukala moshipundi she shuupresidende. Kakele, omawi okuza koCaprivi ngoka kwa li unene ga shilipaleka okuyambidhidha Shixwameni komeho gokongressa, ogo ga etitha Ulenga a mone oshipundi she shuupresidende oshikando oshititatu ihe omomunute gwahugunina elela. Aayambidhidhi yaUlenga, ya kwatelwa komeho kOmunashipundi gopashigwana goCoD, Tsudao Gurirab, oya gandja ompito kOmunashipundi gOpashitopolwa moCaprivi a ninge omupeha-presidende goCoD shoka sha etitha Ulenga a mone omawi ogendji. Konima yokudhengwa mo mehogololo, osheendo shoka kwa li tashi yambidhidha Schimming-Chase naShixwameni osha tindi okutaamba ko oshizemo nokuninga oshigongi shawo pondje, omanga aayambidhidha yaUlenga taya teya oondigolo nokutyapula esindano lye meni lyosaala. Aayambidhidhi mbeyaka oya tindi ishewe okushuna mosaala nokonima sho iiningwanima yokongressa ya tameke. Kakele oya ka shuna mo ashike okuholola omaiyuvitonayi gawo omanga inayi iteeka momutumba. Shixwameni okwa tseyithile okongressa kutya aakwashigongi yamwe okuza moKaras, Hardap, Kavango, Oshikoto shUumbugantu, Kunene lyUumbugantu, Caprivi, Khomas, Erongo, Shikoto shUumbangalantu nOtjozondjupa oya tokola kaa ya ninge we oshitopolwa shoshigongi shoka omolwomakengelelo pokongressa mpoka. Shixwameni ota ti omukulukadhi gwaUlenga pamwe naRosa Namises oya ninga po uulingilingi momusholondondo gomadhina gaakalelipo nokuyakela mo aantu mokongressa. Ta ti Ulenga okwa fala aanona yosikola hoka okuza miitopolwa yokuumbangalantu woshilongo mboka kaye shi iilyo yongundu yoCoD. “Oshi li omukalondjigilile gwaUlenga okweeta aanona yosikola mboka kaye shi nokuli okupopya Oshiingilisa oshowo inaya tseya kutya oshike tashi ningwa po.” Shixwameni ta gwedha po kutya oya nyanyukilwa shoka ya ninga po, kakele ongaalongwantu itaya ka pitika nando ya lungithwe iipilili yomeya. Ota ti oCoD ohayi mono unene omawi okuza moKhomas, Hardap noKaras, ihe itaya ka pitika we ya longidhwe ongaahogololi yayakwawo. Ota ti itaya ka pitika ka we okulongithwa nayi kaantu mboka ihaya si oshimpwiyu nokulonga paendondo dhopevi okumona omawi, mboka haye ya ashike “okulya” kokongressa. “Tse otwa limbililwa kombinga yonkalo yongundu sho tayi ende tashi ningi po ontshona noonkondo.” Ota ti aanona yosikola mboka ya etwa hoka kuUlenga okuza koNooli okwa li ya patela molugumbo ngoka a li nale AmushangaNdjayi gongundu Kalla Gertze. Gertze okwa li i ithana oosekuliti opo a ze mo. Ota ti shika osha ningwa momeho gaUlenga naGurirab, mboka ya tokola okukala inaya ninga po sha. Shixwameni ota ti kutya aakwashigongi yamwe okwa li taya ula yakwawo kutya “aakwankala” nokulombwela Moses Katjiuongua a shune kongundu ye yoDCN ndjoka ya kanena moompa. Ta gwedha po kutya esimokolele mo lyaantu – aakwashigongi olya ningwa koombinga adhihe, ndele inashi ningwa paendondo dhi thike pamwe. Ota ti aakwashigongi mboka yi iteeka mokongressa otaya ka konakona onkalo oshowo okongressa yoyene omanga inaya ninga etokolo. Kakele keiteeko nokuza mo mokongressa, Ulenga ina shuna omutse miipeta nokwa pitike okongressa yi tsikile. Ota ti okongressa oya li nomuyalu gwi ihwapo oshowo kutya ehogololo oli na okuya komeho. Ewiliko epe lyoCoD oli li ngeyi: Alfred Shilinda oye omupevi-presidende, Rosa-Namises oye amushangandjayi, Inocencia Mokhomele omupeha-amushangandjayi naBen Kapi amushangandjayi-dhiginini gwiiniwe.