Samuel Shipanga okwa kwatwa Etivali kOndangwa mekwatafano lomunyeka wokawe wa ningwa kehangano loNAMDIA konima yeemwedi mbali koWindhoek.
Okwa anyenwa omhito yokulifutila mo modolongo pefimbo a holoka momhangu yamangestalata waKatutura Etitatu.
Oshibofa shaye osha undulilwa komafiku 17 Juni 2025 nelalakano lokuninga omakonakono omoule.
Omwedi wa dja ko okwa kwatwa ovalumenhu vavali Andreas Akwaake (53) naImmanuel Iipinge (28) koNoordoewer va hangika noN$750 000 keemuma. Ovalumenhu ava vati inava popya kutya oshimaliwa osho oshashike.
Ova anyenwa omhito yokulifutila mo modolongo pefimbo va holoka momhangu yaKarasburg oshivike sha dja ko.
Omhangu oya ti ovatamanekwa ava otaku fekelwa kutya ove li moshikumungu shomunyeka wokawe koNAMDIA.
Omakonakono opolifi otaa twikile.
Vamwe vomovatamanekwa vavali Sam Shololo naJoel Angula ove li modolongo shaashi vati navo ova kufa ombinga momunyeka wokawe.
Oshibofa shavo osha undulilwa komafiku 23 Mai 2025 opo ku ningwe omakonakono omoule.
NAMDIA ehangano olo hali tuvikile okawe ngeenge taka di keemina.
Neudo, okwa lopotwa ovalumenhu vane va ponokela eembelewa doNAMDIA efimbo lokomatango ndele tava vake mo ouwe.
Poshiningwanima opa dipaelwa omunailonga woNAMDIA kwa li ta longo ongomukulunhu koshikondo sheameno, Eiseb Francis weedula 57.
Francis okwa yashwa nondjebo momutwe kovafekelwa pefimbo kwa li e li kombelewa ta longo.
Opolifi oya hokolola tai ti pefimbo loshiningwanima umwe womovafekelwa Max Endjala okwe liashela nondjebo meembelewa doNAMDIA eshi a mona kutya okwa fitikininwa mo kopolifi.
Endjala okwa ka xulifila koshipangelo efiku olo tuu olo.
Omupopiliko wehangano loNAMDIA, Beverley Coussement okwa koleka ta ti opolifi oye shi pondola okumona okawe ke li pongushu yeemiliona N$40.6 oko kwa li ka vakwa neudo koNAMDIA.
Okwa ti ongushu youwe va vakwa koNAMDIA oi li peemiliona N$314.9.
“Okawe kongushu yeemiliona N$274.3 inaka monika natango. Opolifi oye lipyakidkila nokuninga omakonakono,” ta ti.
Omwedi Maarsa, NAMDIA okwa kufa moilonga pokafimbo omunambelewawiliki wavo Alisa Amupolo, omupedunambelewawiliki Uahoroka Kauta nosho yo omukulunhu woshikondo sheameno Paulinus Sheyako.
-fhamalwa@nepc.com.na