Oshiputudhilo shopombanda University of Namibia (Unam) osha kutha ko kondando yokwiinyolitha, nosha undulile omasiku gahugunina kEtitano lyoshiwike shika.
Omupopiliko gwoUnam Simon Namesho okwa ti aalongwa ayehe yaUnam mboka taya ifutile yoyene oya kuthilwa ko opo ya fute ashike N$2 575, sho kwa li ye na okufuta N$6 575.
“Oshimaliwa shoka otashi ka futwa ashike kaalongwa mboka taya ifutile yoyene, itaaya mono omayambidhidho okuza kepangelo, ihe uuna ashike ye shi enditha nawa,” ta fatulula ngaaka. Ta ti ompito ndjika otayi gandjwa ashike nuumvo, opo aalongwa mboka ye na uunyengwi ya vule okwiinyolitha.
Okwa kumagidha wo aalongwa ayehe mwa kwatelwa mboka ya ishangitha nale nuumvo, ye na oondjo dhosikola, ya thike poombelewa dhawo opo ya tule po omalandulathano gokufuta iimaliwa mbyoka yi li ko.
“Okwiishangitha otaku kala ashike ku na ongushu uuna pwa tulwa euvaneko nomalandulathano nkene oondjo ndhoka tadhi ka futwa ko,” ta fatulula ngaaka.
Okwa popi kutya omayishangitho otaga ka hula momasiku 16 gaFebuluali.
Oshiputudhilo shopombanda Namibia University of Science and Technology (NUST) osha pititha omushangwa kutya kehe ngoka taka futa ko oondjo sigo taku kala oshimaliwa sha thika N$10 000 ota ka pewa ompito yokwiinyolitha.
“Aalongwa taya ka futa sigo N$10 000, nenge oshimaliwa shi li kohi yoshimaliwa shoka otaya ka pitikwa okwiinyolitha inaya futa ko sha,” ya shanga ngaaka.
Oya shanga wo kutya aalongwa oya pewa sigo oJuni ya kale ya mana okufuta iimaliwa ya kala ko, naangoka ta ka ndopa oku shi gwanitha po otashi ka ya moshipala eyinyolitho monakuyiwa. Okwa kwashilipalekwa wo kutya aalongwa ya pewa oombapila dhezimino okuza koNamibia Students Financial Assistance Fund (NSFAF), oya manguluka okwiishangitha itaaya futu sha. “Aalongwa ya taalela onkalo tayi nyengana oshowo oothigwa naya thike poombelewa dhiiputudhilo yawo,’’ ya kumagidha ngaaka. Gerry Munyama omupopiliko gwoshiputudhilo International University of Namibia (IUM) okwa ti ofuto yokwiinyolitha oyi na okufutwa kukehe gumwe.
“Mboka ya mono ezimino kutya otaya futilwa ku-NSFAF oya manguluka okwiinyolitha, ihe mboka ye na ashike ombaapila yokutya okwa ninga eyindilo lyokuyambidhidhwa oye na okufuta okwiinyolitha,’’ ta fatulula ngaaka. Ta ti, oshoka omasiku gokwiinyolitha oga pita nale oya gwedha ko sigo omasiku 15 ga Febuluali. Okwiishangitha oku na N$2 200. Okuza petameko lyomumvo nguka aalongwa yokiiputudhilo yopombanda oya kala nokukonga omayindulo goshimaliwa omanga yamwe taya kongo iilonga opo ya mone oshimaliwa shoku ki inyolitha.
-vkaapanda@nepc.com.na