Omupresidente gwaNamibia Nangolo Mbumba okwa ti oku yambula po aanyasha ogo gumwe gwomomiakalo dhoku kondjitha omashongo ngoka ga taalela iitopolwa yaKavango naZambezi.
Mbumba okwa popi ndhoka uunambo pethimbo a epatulula pambelewa oshikondo shaUnam shuudhindoli, omithitu nomaendathano moKatima Mulilo.
Oshikongo shoka oshipe oshi na ongushu yoshimaliwa shoomiliyona N$300 nosha tungwa po oku pitila momayambidhidho gepangelo lyaGerman oku pitila mombaanga ya lyo yehumokomeho yoKfW.
“Ngele aanyasha yetu oya longwa noku pewa ontseyo muudhindoli, omapekapeko, omithitu, omaendathano, niikwawo oyindji, ota ya vulu ok utu kwathela moku etapo omayamukulo komaudhigu omanene ngoka gena sha nokalekepo lyomithitu. Ota ya vulu wo ok utu kwathela moku mona mo omauwanawa ngoka ge li moonzo dhetu dhopaushitwe,” Mbumba a ti.
Mbumba okwa dhenge omuthindo kutya iitopolwa yaZambezi, Kavango East, Kavango West, oshowo oshitopolwa shaKunene oya taalelwa komaipumomumwe pokati kaantu niithikuti onkene uukalipo waUnam ota wu kwathele aantu moku moku kondjitha omashongo ngoka opo aantu ya tsikile oku kala nombili niithitukuti.
Shi ikololela kuMbumba, oshikondo shoka ota shi hwepopeke oonkalamwenyo dhaantu oshoka oha ya mono omauwanawa pgendji oku za momithitu.
Anuwa aantu mboka ye shi omauwanawa gomakwatathano pokati kayo nomithitu niinamwenyo oshowo oonzo ndhoka ha dhi zi momithitu ota ya kala ye na ohokwe yoku kwatelapo omithitu niinamwenyo.
Mbumba oku na eineko kutya oshitayi shoka shomithitu nomaendathano ota shi yambula po aakalimo yomiitopolwa yaKavango naZambezi oshowo iishiindalongo opo ya tume aanyasha mboka ye li moomvula dhoku ya kiiputudhilo yopombanda opo ya ye koshiputudhilo shoka.
“Otu na omukumo kutya aanasikola mboka ota ya mana omailongo gawo ye na uunongo nontseyo ndjoka twa tegelela aaleli yetu yokomongula ya kale ye na opo ya kuthe aantu yetu monkalo yoluhepo,” osho president a popi ngaaka.
Ngoloneya gwoshitopolwa shaZambezi Lawrence Sampofu okwa ti oshikondo shoka ota shi ka ninga omapekapeko ga simana kombinga yomaipumomumwe gaantu niinamwenyo opo shi nongeke aantu kombinga yomikalo dhoko yanda omaipumomumwe ngoka.
“Einekelo lyetu olyi li pombanda moku yambula po uunongo oshowo oku eta po oompito paku tala kelunduluko monkalo yombepo oku pitila moshikondo shika. Oshitayi shika shi li nawa pokati kiitopolwa yaKavango naZambezi oshe ya pethimbo ewanawa, pethimbo uuyuni wa taalela omalunduluko monkalo yombepo.
Namibia naye okwa kwatelwa mo momalunduluko ngoka onkene okwa pumbwa aanawino miikondo yomithitu nomaendathano opo ya kwathele moku kaleka po uushitwe woshilongo shetu oshoto owu li oshitopolwa sha simana shopangeshefa,”Sampofu ta ti.
-anakale@nepc.com.na