Charles Ndeumane
Aanasikola yamwe koshiputudhilo shelongo lyopombanda shaUnam oya ti onkalo oye ya dhigupalela molwaashoka oshiputudhilo shawo pamwe noshiketha shaNamibia shokufutila aanasikola kiiputudhilo yopombanda (NSFAF) otaya longo nuuhasha mokuungaunga noofuto dhaanasikola.
Aanasikola yamwe yaUNAM oya lombwele onzo ndjika kutya oya ninga ethimbo elele unene ya tegelela NSFAF a fute oosikola dhawo osho wo e ya fute iimaliwa yawo yokwiikwathela moompumwe dhawo shi ikolelela keuvathanotsokumwe ndyoka lyi li pokati kaNSFAF naanasikola mboka.
Anuwa onkalo ndjoka oye ya lulila nokaye shi kutya naya ninge ngiini oshoka kakele koompumbwe dhawo dhopaumwene oye na uumbanda kutya Unam ite ya pitike ya mone iizemo yawo yekanakono oshoka oofuto dhawo dhosikola inadhi futwa nonande Unam oye e na epuko oshoka anuwa iha tumu uumbapila waanasikola womafutilo pethimbo kuNSFAF.
Gumwe gwomaalongwa yaUnam mboka omadhina gawo itaaga vulu okutumbulwa okwa ti ngashiingeyi okwa ningi oomvula mbali a tegelela NSFAF a fute osikola ye osho wo iimaliwa ye yopaumwene ashike inashi ningwa.
“Momumvo 2022 inandi ya kosikola molwomashongo gopaumwene, omumvo gwa zi ko onda ishangithulula nee koUnam ndi shune mosikola ndele omvula ayihe oya pu ko ashike Unam inaa tuma okambapila kandje komafutilo opo NSFAF a fute osikola yandje. Kehe ethimbo tandi dhengele kombelewa yaUnam ohaku tiwa ashike okambapila oka tumwa ndele nda li nee okutega osikola yandje yi futwe. Omwedhi nguka sho nda dhengele kombelewa yaNSFAF opo taya lomwelendje kutya Unam opo a tumu okambapila kandje komafutilo ndele natango oka puka. Aaniilonga yaUNAM naNSFAF inaya itula mo miilonga yawo, oyo taya longo nuuhasha ndele kehulilo lyesiku otse tatu mono iihuna,” osho omunasakilola gumwe gwaUnam a popi ngaaka.
Omunasikola ngoka okwa tsikile ta ti uuhasha waUnam naNSFAF owo hawu eta aanasikola oyendji ya thige po osikola nenge ya kuthe ombinga miinima iiwinayi ngaashi uufuthi kaalumentu osho wo okwiilanditha kaanasikola aakiintu opo yi imonene iimaliwa ya gwanithe po oompumbwe dhawo.
Omusikola omukwawo okwa ti oku na uumbanda kutya Unam ite mu etha a mone iizemo ye yekonakono oshoka sigo oompaka NSFAF ina futa osikola ye osho wo iimaliwa ye yopaumwene. Ta ti onkalo ndjoka oye mu thiminike a kale pehala inaa panda po oshoka ke na iimaliwa yokwiifutila olukalwa lu li hwepo.
“Yakwetu oyendji oya mona iimaliwa yawo noosikola dhawo odha futwa ndele tse sigo onena otwa tegelela ashike nonande nguka omwedhi gwahugunina gwaNSFAF gwokufuta iimaliwa yaanasikola. Ando NSFAF okwa futile iimaliwa yandje ando hapo handi zi mpaka ndi li paife oshoka kapu shi pehala ewanawa nokwiilongela,” omunasikola omukwawo ta ti.
Omukuluntuwiliki gwaNSFAF Kennedy Kandume okwa ti moompito odhindji iiputudhilo yelongo naanasikola oyo haya etitha oofuto dhawo dhi ende kashona.
“Esiku lyahugunina lyaNSFAF lyokufuta olya li 28 Kotomba 2024, ngele opu na aanasikola inaaya futwa ngiika epuko olyi li pokati kiiputudhilo yelongo naanasikola. Ethimbo limwe aanasikola ohaya kala ye shi shoka ya ninga tashi etitha omashonga ngoka ashike ihaye shi popi ngele taya gandja omakemo gawo kiikundaneki,” Kandume ta ti.
Omupopiliko gwaUnam Simon Amesho okwa ti olundji ohapu kala omashongo mokuungaunga noofuto dhaanasikola mboka ya li pevi ndele e taya galukile mosikola konima yethimbo.
mrndeumaneryachrles@gmail.com