Universitaits Namibiab dis (Unam) ge ǂoa ge wekheb di Mantaxtsēs ai ǁîs di ǂguro nî ī soǀôan di !khaiba Hage Geingob Kampes hîa dana!ās !nâ mâs tawa ǂhanusise ge ǁkhowa-am. 

Nē soǀôan di !khaib hîa universitaits di !Nakaǂnôa Kanseliri, Kenneth Matengub xa ge a ǀhui-amheb ge ǁîb a ǀgamǁîse Afrikab !nâ ra !gawaǀîhe, Universitaits Cape Towni, Suid Afrikab dib ge ǂguro !nās ase soǀôan!khaiba ǁîb kampes ai ǀhui-am hâ is khao!gâ. ǁÎb di gowaǀîs !nâb ge professor Matenguba gere ǀgonǀgon!gao !khais ge, nēti ī ǂhâbasa xūna universitait-i ai ūhâs ra ǁkhāǁkhāsens !nâ mâ studentna ǁnāti ī !ēs amabe ǂansa dīǀgaugu !nâ-ū hōs disa māsa. 

“Nēs ge a !aroma, nēti ī ǂhâbasa xūna da studentna ǁîn ǁkhāǁkhāsens !âse ra hā-ūbasa, in ǂkhanimûs ǁkhākhāsensa ǁkhāti ama dīǂuib !nâ ǁgauǂui tsî !augab tsî ǂnûiǂgādi !nâ ǁkhāǁkhāǂuisentoas khao!gâ sī sîsens hâra ǁaegu hâ soaba ǀoasase sī!nâ ǁkhā,” tib ge gere mî. Professor Matengub ge noxopa ge mî, Unams ge nē aiǁgausa a ūsa î gu Afrikab nau !hūgu tsîna ǁkhāsa dī tsî !gâi !ēde ǁkhāǁkhākhâis !nâ hâ studentna sī-ūba. 

“Nē soǀôan!khaib, nētsē da ra ǁkhowa-ammi ge Afrikab !nā!nuis !nās !aroma ǁîb a ǀgamǁîse i. ǂGuro soǀôan!khaib universitat-i ūhâb ge Universitaits Suid Afrikab dis di kampes tawa hâ. Sada ge, Tita ra ǂâisa !oa, hoa Afrikaba aiǁgause ība,” tib ge ge mî. Ai!âb ge Matenguba, Unams di ǁguiǂgāsens ǁîs !hūb di omkhâisens !nâ nî !â-e ǀhuru studentna ǁkhāǁkhākhâis !nâ hâsa ǁkhawa gere ǁawoǁawo. 

Mîb gereses, nē universitaitsa ǁîs ais !huis âsa a !gao!gaosa ǂHanumās di ǂgaoǀkhādi ai ra dīoaǀoasa, khoen hîa ǂgaoǀkhāsa !harib ai ǀgau rase !oabade mā tsî !hūba nî omkhâina nî ǁkhāǁkhākhâise isa,” tib ge Matenguba gere ǀgonǀgon!gao. Miles Musimbeb, ǁîb soǀôaǂansabese nē soǀôan!khaiba nî !khōdanab ge ge mî, nēpan !kharagagu soǀôa!nôan tsî !oabade nî māsa. 

“ǁKhāti da sida nēpa xu nî mān ge: soǀôan, !khādi tsî ǀgurun soǀôan tsîna ǀae!khō-aon skoli tsî ǀgurun ǀae!khōs tsî soǀôan skoli hâkha, tsî nau hâ !gaeǁaresa ūhâ !oaban hîa ǂurusib senters tawa hân tsî Unams tsîna hoa!nâ-aixase,” tib ge ge mî. Dana Sîsenǂui ra Dekens, Fakaltaits ǂUrusib ôa!nâdi tsî ǀGurun ǀAe!khōs tsî Soǀôan dis, Judith Halls ge ge mî, nē ǀasa soǀôan di !khaib nî ǂguro xrati !aroma ra ǁkhāǁkhāsen studentn tsî ǀnai ǁnā !harosa !kharu hân tsîn hoana !oa!ū hâ ǂansa māsa. -Nampa