Paulina Ndalikokule
Aanamagumbo ye li 12 mOkongo, oya ningi aanelago sho kehe gumwe a pewa iikombo yokumuna yi li 10 kehangano lyo-UNDP.
Iikombo mbika ayihe kumwe 120 oya li ya gandjwa mEtiyali momukunda Omufituwekuka moshikandjohogololo Okongo.
Kansela gwaKongo Efraim Shipindo moshipopiwa okwa ti pakuudha, UNDP okwa li a yambidhidha noshimaliwa shoN$700 000 koshikandjohogololo opo shi vule okukwathela aakwashigwana ye li 31 moopoloyeka ngaashi iikombo, oondjuhwa, iikunino yopaumwene pomagumbo oshowo uumeno wiiyimati.
Okwa ti aakwashigwana mboka mwa kwatelwa aakiintu yeli 17 naalumentu 14 oshowo aantu mboka ta ya lumbu shokadhila oya li ya hogololwa pauyuki koshigwana miigongi mboka yaningilwe.
“Aantu yeli yahetatu otaya ka pewa oondjuhwa 30 kehe gumwe, gumwe ta pewa oshikunino omanga aantu 10 kehe taya ka pewa omiti 10 dhiiyimati oku za moshimaliwa shoka,” Shipindo a yeleke.
Mboka yapewa iikombo oya tegelelwa yaka shunithe iikombo yili ine konima yoomvula mbali opo yi vule oku ka pewa ooyakwawo.
“Otandi indiile aakwashigwana yiiyuthe ketsokumwe ndjoka twatula po okugalula iikombo yili ine konima yoomvula mbali opo yivule oku ka pewa aakwashigwana yalwe,” a ti ngaaka.
Ta ti ehangano olya kwathela woo oku gandja omadhewulo kombinga yomiti dhayooloka hadhi adhika momalundu noshimaliwa kaantu 16.
Ontseyo ndjoka aantu mboka ya mono na ye yi longithe nawa opo ya vule oku keelela embugaleko lyomiti, oku teta po omiti osho woo okwiimonena iiyemo,” ta ti ngaaka. Mboka ya li ya pewa iikombo oya li ya pandula noonkondo, ta ya uvaneke kutya ota ya ka muna nawa opo ya vule oku galula iikombo mboka ngaashi yuuvaneke.
-ndalikokulep@gmail.com