OSHAKATI
Ehangano lyIigwanahangano li nasha nonkalonawa yaanona – UNICEF otali ti “olya limbililwa noonkondo” kombinga yonkalonawa yaanona mookamba dhaatembudhwa yefundja mOshakati nOngwediva. Aanona oyendji mboka oosikola dhawo dha patwa omolwoondondo dhomeya omale miitopolwa mbyoka ya gumwa kefundja, Omunambelewa gOmakwatathano nOshigwana moUNICEF, Judy Matjila, ota ti aanona mbaka oye li ashike taya elaela kaye na shoka taya ningi.Oosikola odhindji moshitopolwa Oshana odha patelwe ethimbo ele moshikako shotango shosikola. Omupehakuluntuwiliki gwElongo mOshitopolwa, Immanuel Aipanda, ota ti mokati koosikola 130 moshitopolwa, oosikola 11 moka mu na aalongwa yondondo onti-10 odha patelwe okuza pehulilo lyaJanuali, oshowo ooprimasikola 10. Shika otashi ti aanasikola ye li 2 747 oya gumwa konkalo ndjika. “Aanasikola oya gumwa lela noonkondo adhihe, kutya nee opoosikola dhoka ootundi tadhi tsikile,” Aipanda ta ti. Ota ti uuministeli welongo owa limbililwa shi nasha naanongekwa yondondo onti-10 mboka taya ka pulwa ya nyole omakonakono pehulilo lyomumvo. Uuministeli pethimbo ndika otawu dhiladhila okutameka nootundi dha tuninwa aanona mboka ya gumwa konkalo yefundja pethimbo lyefudho lyosikola ndyoka tali tameke eti 11 Apilili sigo 13 Mei. “Onkalo ndjika oya nika oshiponga. Otwi ineekela nokwiikolelela kaalongisikola yetu mboka ye na omukumo neitulomo opo ya pitike aanona mbaka ya vule okweendela pamwe nethimbo meilongo lyawo.
Onkalo ngaashi yi li pethimbo ndika, otwi ineekela ashike kutya omeya otashi vulika ga ka shune pevi. Ngele onkalo oya nayipala, nena otatu ka dhiladhila po ondunge yimwe, kakele sigo oompaka kape na ondungethaneko ontiyali manga,” Aipanda ta ti. Uuministeli otawu dhiladhila okutembudhila aanasikola momihandjosikola mOshakati, Ongwediva nOndangwa, kakele shika osha talika ko ethaneko li na ondilo noonkondo notashi vulika itali ka tulwa miilonga. Edhiladhilo ekwawo tashi vulika li ka longe ngele onkalo oya shuna kuuwanawa, Aipanda ta ti, okutota po ootundi dhOmolyomakaya.
“Otatu ka kala nokutonatela onkalo neitulomo alihe,” omunambelewa gwelongo ta ti. Omunambelewa gOmakwatathano nOshigwana mUuministeli wUuthikepamwe wOpaukakwashike-ko-kantu nOnkalonawa yAanona, Taati Andimba, ota ti onkalo mookamba moka mu na aatembudhwa yomeya gefundja kayi li nawa konkalo yaanona, oshoka aantu kaye na egameno li ihwapo ngele tashi ya komaukwatya gawo gopaumwene. Oshikwawo mookamba kamu na oonkalo dhuuyogoki. Omunambelewa gopankalathano muuministeli owo tuu mbuka, Loide Nekundi, ota ti uuministeli otau ka ya mo okanyala mookamba oku ka kwathela nokuyambidhidha aakomeho moka ya vule okukaleka po omudhingoloko tagu opalele onkalo yaanona.
Uuministeli owu na etegameno okulongela kumwe noUNICEF mokudheula aantu mookamba opo ya vule okulonga naanona mboka, nokudhika po otenda mokamba kehe opo aanona ya vule okukala hayi ipyakidhile niilongadhalwa yelongo nosho tuu. “Aanona mboka ya tembudhwa oyi iyadha ye li moonkalo kaa dhi li nawa. Ano otu na okukonga po omikalo dhontumba dhokukaleka aanona yetu yi ipyakidhile nasha tashi ya tungu,” Nekundi ta ti.
Homateni, ngoka e li omupangi pOkaklinika pOutapi moshitopolwa Omusati, shimwe shomiitopolwa ya dhengwa ya lila konkalo yefundja, ota ti aanamikunda oyendji oya keelela komeya okumona omayakulo nesiloshisho lyopaundjolowele oshowo oonzo dhilwe.
UNICEF okwa landa ishewe ootenda dha gwedhwa po, omiti dhokuyeleka omeya, iidhanitho yaanona ngaashi omatanga nuudhanitho wulwe oshowo iipumbiwanima yilwe yopaukalinawa. Natango UNICEF ota yambidhidha oonkambadhala dhi nasha niinima ya guma efundja dhuuministeli wayooloka miitopolwa mbyoka tayi hepekwa konkalo yomeya gefundja, ngaashi okugandja omadheulo kaadheuli yayakwawo (aadheulwa taya dheulwa ya ka gandje omadheulo kuyakwawo) mOshakati nelalakano okukandeka omaupyakadhi taga etithwa komikithi ngaashi okolera nomalaria.