OUTAPI – Oongundu dhopapolitika, United People’s Movement (UPM) oshowo Kingdom of God (KG), odha patulula oshitayimbelewa shadho mOutapi, moshitopolwa shaMusati Etitano.
Oongundu ndhoka odha patulula ombelewa yimwe, okulongela pamwe oshoka anuwa odhi na elalakano lyimwe.
Ongundu yo-UPM oya li ya totwa tango momasiku 30 Kotomba 2009, pamushangwa gwayo otayi ulike kwa li ya shangithilwa mehangano lyi na sha nomahogololo tali ithanwa Electoral Commssion of Namibia (ECN) muJuli 2010.
Ongundu yoKingdom of God, oyi li mekwatelokomeho lyomupresidente Polykarp Ameya.
Omupresidente gwongundu yo-UPM, Jan van Wyk, ngoka oye a li omupopi gwesiku a simana, esiku ndyoka okwa fatulula kutya oya patulula ombelewa yawo mOutapi opo omayakulo goongundu oshowo gaalanduli yawo, ga etwe popepi.
“Oongundu dhetu otadhi yambidhidha mboka yaa na oonkondo oshowo omawi gaa uvitike. Odha totwa natango okulwitha uulingililingi nokutula po elandulathano,” ta popi ngaaka.
Ta ti ombelewa yawo ndjoka ngashiingeyi ya patuluka otayi ka eta elunduluko mongundu yawo oshoka otayi ka longithwa okuhwahwameka oongundu dhawo oshowo okugwanitha po oompumbwe adhihe dhaalanduli yawo.
“Omumvo nguka otagu kala gwa simana kutse oshowo koshigwana ashihe, sho omahogololo ngoka twa taalela pamwe taga ka eta omalunduluko,” ta popi ngaaka.
Okwa kumagidha wo aalanduli yongundu yo-UPM oshowo Kingdom of God, ya kale yi ilongelela omanga taya longekidha omahogololo.
Ta ti, otaya kala nokugalikana omahogololo ga kale ge na ombili, ge na elandulathano oshowo uuyuuki.
“Otu li metifa lyokulongekidha aakalelipo yetu, opo tu kwashilipaleke kutya omawi getu agehe oga gongelwa nokuyalulwa, omolwuuwanawa woshilongo shetu,” ta popi ngaaka.
Van Wyk okwa kumagidha oshigwana shi ye mehwata opo shi hogolole omolwomauwanawa gawo.
Okwa totha mo omashongo ga taalela Namibia, ngaashi omahepeko goomeme momagumbo, ngoka ga pumbwa okukandulwa po opo oshilongo shi kale shi na elandulathano nombili.
“Kehe gumwe nuuthemba we, onkene kehe gumwe oku li kongundu ye hoka e wete taku mu longele omauwanawa,” omulanduli gumwe a popi ngaaka esiku ndyoka.
Ta kumagidha oshigwana ta ti nashi hogolole ongundu ndjoka tayi eta omalunduluko oshowo omauwanawa.
Ta ti, UPM oshow Kingdom of God oongundu dhi lile po oshigwana nodhi na omalalakano omawanawa.
-vkaapanda@nepc.com.na