Marwanambo gana kara mombunga politika United Peoples Party (UPM) ngesi kuna kukasika nye kompanguro omu hamutjanga ntoni ana kutwara president gwawo kompanguro morwa yimaliwa eyi ana kugazxara asi kwayiruganesa pwahana asi paveta.
Mokukwama nombapira edi gatwara nye kompanguro zonene moVenduka, UPM hamutjangantoni age hena silyo sombongarero zanavenye, Celeste Becker kuna kutanta asi president gombunga zawo Jan van Wyk , kumwe nahamutjanga gomapukururo Francis Huish, ntani komitiye zegendeso, omu gava vatera Frans Bertolini, ogu ana kara asi nage gumwe anyetere kombanga koyimaliwa yombunga politika zawo, awo kwaruganesa nye yimaliwa eyi pwahana asi paveta. Yimaliwa eyi kwatunda kepangero, vagava ko UPM kupitira mombongarero zanavenye kukwama mavango ogo vakara nago nampili ngomu vakara asi awo kwakuruganena kumwe naPDM, yimo ana kutanta Becker konombapira edi kageve kompanguro. Becker simpe katente asi Van Wyk kwaruganesa nonkondo dagelike omu gahagekesa nompitisili dimwe moyirugana yado.
Omu muna hamene Becker, munasipundi, hamutjangantoni gona, ntani mukarelipo yimaliwa. Mo 6 Nsinano, Huish kwamupere asi yige ana kara hamutjangantoni gokukwateramo, ogu ana kara asi kapi vamuhorowora mokukwama Becker. Age katente asi nayinye eyi kwayirugana vahana kupitira mokomitiye zawo zontjima ntjima zina kara asi kapi vakara nosigongi nkenye kutunda tupu apa vavahorowora mwa Kudumogona 2022. Mokukwama mwendi age Becker, mo 6 Nsinano, komitiye zegendeso kwakere nosigongi, esi sakere asi kapisi paveta. Age simpe katente asi Van Wyk ogu ana kara asi president gombunga zawo kwakere nepongo lyovanambudi omu gatanterere vantu asi mbunga zawo kuna kara moudigu woyimaliwa, ntani kuna kara negendeso lyedona pasimaliwa morwa yige. ‘’ Gokuhova, gwauvali, gwautatu ntani gwaune ava ganatamba makuye kapi vakwama veta, ntani vagusapo nhye elikwamo lyaUPM omu vavahorowora vakare momberewa,m eyi ana kurwanesa Becker. Age kuna kupapara nye asi mpanguro zikatokore asi eyi ana kurugana Van Wyk kapisi paveta ntani vatulire nayinye eyi ana rugana ntere dogoro vamane malituturo gangesi. Ntani age kuna kuhundira asi mpanguro zahapulisira vantu ava varuganese yimaliwa yombungapolitika zawo opo vana kuvatwara kompanguro.
Becker kuna hara asi mpanguro, zitante asi Van Wyk, Hiush ntani komitiye zegendeso vahavapulisira hena vakasikame momovango nkenye gaUPM ntani monombunga nadinye odo valipakerera nawo. Age simpe kuna hara asi yimaliwa oyo vapira kuruganesa nawa kutunda mwa Muronga nkuru varuganesa Van Wyk,Huish ntani komitiye zegendeso vayitengwide kombunga politika zawo. Van Wyk, Huish ntani komitiye zegendeso navenye kavatente asi awo vana liwapayikire mokukarwanesa sirapotwa sangesi. Sirapotwa kuna kara nye momawoko gomupanguli Collins Parker. –mamakali@nepc.com.na
(Celeste Becker) photo contributed )