Victoria Kaapanda
OSHAKATI-Uudhano woku ulika omatha momaako tawu ithanwa arm wrestling owa thanekwa wu ka kale ko momasiku 2 gaDesemba nuumvo mOshakati pehala tali ithnwa Wine &Garlic Pub and Restaurant.
Omalugodhi ngoka taga ka u lika ngoka e na oonkondo otaga ka kala gotango moNamibia alihe, notaga kala haga ningwa omvula kehe. Nonande uudhano mboka wa kala hawu dhanenwa pehala ndyoka lyoWine and Garlic Pub and Restaurant omimvo dha yi, omvula ndjika oya tokola oku shi ninga pambelewa opo kehe ngoka a hala okukutha ombinga momayinyanyudho gomalugodhi gokomahoko a kuthe ombinga.
Arm Wrestling omalugodhi gokomake, okutala ngoka e na oonkondo e vule mukwawo, ohaga dhanenwa poshitafula sha ukilila nawa, ngele pe na yaali taya ulike oonkondo dhawo. Ngu okwaako kwe kwa lalekwa poshitaafula nena okwa sindiwa oonkondo.
Mwene gwehala ndyoka tali ka dhanenwa omawudhano ngoka, oshowo omugandji gomawuyelele gokomitiye yo Arm Wrestling John Ndume okwa ti oya longekidha omayinyanyudho ngoka nelalakano oku eta oomeme nootate oshowo uunona pamwe ya imenye mo esiku ndyoka.
“ Kehe ngoka ta ka kutha ombinga momalugodhi ngoka okwa tegelelwa a kale e na oonkondo oshowo omaako gen a omongo. Nesiku olyo tuu ndyoka olyo taya ka topolelwa moongundu ndhoka ye na okukala sha ikolela kondjundo yolutu lwaamboka taya ka kutha ombinga”. Ndume ta ti ngaaka.
Ta gwedhapo ta ti omawudhano otaga ka tameka konima yomambo Osoondaha ndjoka sigo nake mu faalele.
Ndume ta ti ngashiingeyi o ye na omadhina ga pita po16 noya tegelela kehe ngoka e na ehalo a kuthe ombinga.
“Elalakano lyokuya po nolugodhi ndoka oku eta omawudhano gowrestling pawuyelele oshoka oyendji kaye ga shi, opo siku limwe lyomomasiku tu mone ompito yoku ga shangitha onge omawudhano ga simana moNamibia kohi yuuministeli womawudhano”. Ndume ta ti.
Ta gwedha po ta ti oyendji oya thanekwa nokushangwa komalutu, esiku ndyoka otali ka kala ewanawa oku ulika ootatu dhawo.
Oongundu odha topolwa patatu. Ondjundo oyindji, ondjundo yopokati oshowo ondjundo ndjoka ya hugunina onshona, moka tamu ka tothwa omusindani gumwe ta ka zimbuka nomagano ngaashi iimaliwa yi thike pooN$1 500, okambindja, ekopi, oshowo ombandi ndjoka ta kala nayo uule womvula.
Remind Enterprises, Lucas Tshithigona, Yap Gym oshowo Kasi Gym oya iyamba naashoka ye na okuundula omawudhano ngoka gaye komeho.
Ngoka a hala okukutha ombinga, oku ishangitha oku na N$150 ye na kwatathane nonomola 081 2331 233, omanga iiwike iyali komeho inayi adha.
Omawudhano ngano oga kwatelwa wo komeho kaanangeshefa ya tseyika nawa mboka oyo taya ka kala taya yalula nokutothamo mboka taya ke shi enditha nawa siku ndyoka, ngaashi Remind Ekandjo, Dj Punyati naInotila Kambidhi.
Mboka oyo taye shi kwatele komeho oshoka oye na ontseyo yomawudhano goludhi ndoka. Kehe gumwe moNamibia alihe okwa tegelelwa a kale a thika eye a tale iiti sho tayi teka.