OSHAKATI – Yamwe yomaakalimo moshitopolwa shOshana oya indile opolisi opo yi ye po nokangendjo kuusiku oshoka anuwa inaya manguluka ngele yeli momagumbo, omolwa aafuthi ya pimbila.
Oshiwike sha zi ko kakukutu komatanga gopolisi Inspecto General Joseph Shikongo okwa totha mo Oshana onga oshitiyali miitopolwa yi na iimbuluma yili pombanda.
Tresia Mutota gwomOshakati okwa ti oye li momagumbo ya tila mo, oombudhi odha pimbila, kashina omutenya nenge uusiku.
“Mehulilo shiwike muka onda kundana omagumbo gatatu ga ponokelwa koombudhi, omanga aanegumbo ya kotha. Inatu manguluka we, ita tu kotha we nawa,’’ ta nyenyeta ngaaka.
Ta ti, ngele okangendjo kuusiku ka galulwa ngaashi sha li sha ningwa ethimbo lyoCorona, onkalo otayi hwepopala.
Simson Sheendelwako ngoka ha felefula Oshakati, Ongwediva nOndangwa okwa ti, 18h00 ngele ya dhenge naye okwa zimbuka.
“Ihandi zimbuka nda hala, ihe omolwa ndina uutile woku yugwa ohauto yandje kaafuthi, oondolopa ndhoka ndatu ka dhili we nawa,” ta hokolola ngaaka.
Sheendelwako ta ti, oombundhi paife ohadhi kwata ko aahingi yootekisa komulungu gwondjembo taya longithwa iilonga hayo.
Mehuulilo shiwike omulumentu gwomimvo dho po kati omuAngola okwa si sho atsuwa noombele kaafuthi, kOshakati.
Omupevikuluntu gwoshitopolwa Frederick Ndjadila okwa ti, oshiningwanima osha holoka komatango gEtitano moshana shili po pepi nolukanda Omutuni mOshakati.
“Omulumentu ngoka okwali pamwe nayakwao yomimvo 28 oshowo 31, taya zimbuka ko kulanditha omihaka nuulishasha woongodhi, sho ya ponokelwa kaalumentu kaa ye yashi,” ta popi ngaaka. Yakwawo mboka anuwa oyeshi pondola okumatuka po omnga nakusa a li ayugwa uulishasha wongushu N$1400, noshimaliwa koomuma N$700.
Omukuluntu gwopolisi moshitopolwa shaOshana Naftal Lungameni Sakaria okwa ti, okangendjo kuusiku ohaka tokolwa komutse gwoshilongo, ihe ha kuye.
“Ota tu longo nuudhiginini okushonopaleka noku hulitha po iimbuluma ihe, otayi tsikile,” ta po pi ngaaka.
Sakaria ta ti, opolisi mOshana otayi longo omutenya nuusiku, tayi patolola, ihe natango iimbuluma otayi holoka.
Ta gwedha po ta ti, otaya tsikile okulonga nuudhiginini opo ya gamene oshigwana shawo oshowo ya kale ke po ombili mo kati koshigwana.