Omandiki goMTC moshitopowa shaShana ohela oga piti guudha aantu mboka anuwa uukalata woongondhi dhawo wa tetwa mo mombepo.
Kakele kaMTC, ehangano lyoTelecom Namibia nalyo olya koleke koshikundaneki shimwe kutya olya teta mo uukalata uli 191 598. MTC olya kala noku kumagidha oshigwana shi ndhindhilikithe uukalata wa wo, okuyanda oongondhi dhawo dhi tetwe mo mombepo.
Esiku lyahugunina lyoku ndhindhilikitha uukalata okwali 31 gaMalitsa, sho kwa kala taku undulilwa omasiku komeho kuza omumvo gwayi. Oyendji oya nyenyeta kutya oongeshefa dhawo otadhi shuna monima oshoka ongodhi dhawo odha tetwa mo mombepo.
‘’Se ohatu longitha oongodhi moongeshefa dhetu, no ngele ka tuli mombepo ita tu vulu okulonga,’’omusamane gumwe ta nyenyeta ngaaka a kalela omweelo goMtc pOshana mall.
Maria Shikongo okwa ti, okuna oongondhi mbali, ihe adhihe okwedhindhilikitha esiku limwe, ashike nena sho a penduka, okakalata kamwe oka tetwa mo mombepo.
“Shoka otashi ti ngiini, onomola yandje ndji ya tetwa mo oyo yina oshilongo. Ngame omunasikola, otandi pitililwa po, oonomola odhindji odhili mo kakalata haka,” ta ti ngaaka. Nonando oshigwana sha kala noku lombwelwa kutya nashi nyolithe uukalata wa wo, oyendji oya tegelele ethimbo lya hugunina. Omunambelwapitithi omukuluntu John Ekongo okwa ti, kehe ngoka taka ndhindhilikitha okakalata ke okuza mo 1 April sigo 30 Juni nuumvo, onomola ye otayi shunwa mombepo, ethimbo olyo tuu ndyoka.
“Ihe ngele omwendhi gwaJuni nuumvo ogwa pu ko, opena ompito onene opo onomola ndyoka yi gandjwe po,’’ ta fatulula ngaaka. Ekongo okwa indile oshigwana shi longele kumwe naanambelewa yawo, opo ya vule okuyakulwa.
MTC okwa eta po omukalo gokushangitha uukalata woonomola komadhina gooyene mo2022 muJuni. Oya fatulula kutya omayishangitho otaga ningwa omolwomakengelelo gaafuthi uuna taya longitha omukalo gopangodhi okuyuga oshigwana iimaliwa nosho tuu.