Aalongwa yaali ya za moshitopolwa shaLimpompo oyi iyadha monkalo yi vule oonkondo dhawo sho anuwa ya landitha uukuki wuumuffin wa lugwa niingangamithi kaalongwa aakwawo.
Aanasikola ye li 20 oya li ya kwatwa kuuwehame noya taambelwa moshipangelo. Omupopiliko gwopolisi yaLimpopo Robert Netshunda okwa li a koleke oshiningwanima shika nokwa ti uukuki mbuka owa falwa komakoonaakono opo ku kwashilipalekwe ngele owa gogwa tuu omapangwe shili. Okwa ti opolisi oya li ya kwata po uumatyona uyali woomvula 16 wu ka pulwaapulwe.
“Uumatyona mbuka otwe u mangulula nangashingeyi ou li momatonatelo gaakuluntu yawo notwa patulula oshipotha moshiningwanima shika,” ta ti ngaaka.
Ashike aakalimo yomomukunda Greenfarm melendoolopa lyaCollins Chabane otaya pula mbaka yaali ya katukilwe onkantu, konima sho aalongwa ye li 20 ya li ya ningi iihakanwa. Oshiningwanima shika osha li sha ningwa esiku limwe manga etokola lyopaasa inaali thika.
Anuwa aalongwa mboka ya lya uukuki mbuka oya li taya ihumbata pamikalo tadhi limbilike omanga yamwepo ya li taya kambuka. Oshipangelo shomomudhingoloko ngoka shedhina Malamulele osha li sha kwatathanwa nasho naanasikola 20 oya li ya falwa koshipangelo hoka ya li ya pangwa nokulalekwa. Aanasikola mbaka yaali otaku ti oya itaala oshiningwanima shika.
“Oya ti oya fulukitha epangwe nokulumbakanitha omeya opo ya mbake uukuki,” osho omulongi gumwe ngoka inaa hala okutumbulwa kedhina a ti ngaaka.
“Oye na ookastoma dhesiku kehe ndhoka hadhi hili epangwe nosha li ashike sha ponyo esiku ndyoka sho ya landitha papuko uumuffins mboka wa lungilwa epangwe kwaamboka ihaaya hili.”
Omunashipundi gwelelo lyosikola Morris Mabasa okwa li a koleke oshiningwanima shika ashike ka li a hala okutya ko sha. Omumvogali, aalongwa 23 ya za koKgakala Secondary School oya li wo nayo ya nyenyeta taya thetwa momapunda noya li ya kungu konima sho ya li ya li uumboloto mboka ya li ya landithwa kaalongwa aakwawo.
Omupopiliko gwoshikondo shelongo Sam Makondo okwa li a koleke oshiningwanima shika nokwa ti: “Otu uvite nayi noonkondo oshoka oosikola dhetu odha li dhi na okukala dhaa na iingangamithi.” Makondo ta ti inaku katukwa onkatu sigo opaife oshoka oshiningwanima oshi li momake gopolisi.