Uuministeli wuuhaku natango owu li metifa nomakonaakono kutya oshika sha etitha omaso goohanona mbali ndhoka dha li dha lopotwa anuwa dha hulitha konima dha li dha tuntilwa.
Pokati komasiku 18 sigo 22 gaJuli nuumvo, oohanona ndhoka mbali dha li kohi yoomwendhi mbali, okwa li dha hulitha konima anuwa kwa li dha tuntilwa, pokapangelo okashona Eluwa mOngwediva.
Otaku hokololwa kutya ohanona yimwe okwa li ya si konima yoowili dhontumba ya tuntilwa, noya kala nokulila okuza ethimbo ya tuntilwa.
Ohanona onkwawo anuwa okwa li ya hulitha konima yomasiku gatano ya tuntilwa nonando kakwa li yi na uuwehame washa.
Omunambelewa omukuluntu guuhaku Ben Nangombe okwa ti, uuministeli owu na omilandu dhomondjila ndhoka hadhi landulwa uuna omaso gombaadhilila ga holoka.
“Uuna eso lya holoka omolwomatuntilo, aluhe ohaku ningwa omakonakono opo ku monike shoka lela sha eta eso ndyoka,” ta fatulula ngaaka.
Ta ti, aaniilonga ayehe mendiki lyuuhaku taya ningi omatuntilo moshilongo, oya dheulilwa shoka hashi vulu oku eta uupyakadhi uuna omatuntilo taga ningwa oshowo omilandu dhi na okukuthwa una sha, sha holoka.
“Itandi vulu okukoleka kutya omaso ngoka gaali oga etwa kotuntila pethimbo ndika, ihe otwa tegelela mboka ya popyoka moku konakona ya mone shoka sha etitha omaso ngoka,’’ ta popi ngaaka.
Nangombe okwa ti oya tegelela omakonakono ngoka ga manwe, opo ya pitithe shoka lela sha etitha omaso ngoka taga tengenekwa ga etwa kotuntila.
Okuza omwendhi gwa ziko ookansela monooli miitopolwa ya yoolokwa oya kala noku igidha mooradio opo oshigwana shi ka tuntilwa poosenda miikandjohogololo ya yooloka.
Ootuntila, mwakwatelwa ndhoCovid-19 oshowo ndhoku keelela omikithi dha yooloka, odha kala tadhi tuntilwa oshigwana ihe natango odhi li metifa.
Konima oohanona ndhoka kwa li dha hulitha okwa li dha mbandameke oshigwana, onkene osha hala okuuva oshili kutya oshike sha dhipaga oohanona ndhoka.
Omukulukandhi gumwe okwa li a popi koradio , ta ti, ehalo oye lina lyoku tuntilwa shili ihe oya tila.
“Ngele otuntila oya ndhipaga oohanona ndhoka mbali, otaya kwashilipalekelwa ngiini kutya ootuntila adhihe itadhi keya ndhipaga,” ta pula ngaaka.
Ta ti oya hala iizemo yomayamukulo ngoka tango opo yaka tuntilwe.
– vkaapanda@nepc.com.na