Omukuluntu gwelongo Sanet Steenkamp okwa popi kutya omasiku 22 gaNovomba nuumvo otali kala esiku lyahugunina lyosikola kaanona.
“Otwa lundulula okaliindeli kosikola omolwomahogololo gapaupelesidente ngoka taga ka kala ko momasiku 27 gaNovomba. Esiku ndyoka natango olya hogololwa kutya esiku lyefudho lyaalongi naalongwa,’’ ta fatulula ngaaka.
Steenkamp okwa gwedha po kutya omasiku gepato lyoosikola lyaalongwa oga lundululwa okuza momasiku 06 gaDesemba ga ningi 22 gaNovoomba, omanga omasiku gepato lyaalongi naanambelewa yalwe ga lundulwa okuza momasiku 09 ga ningi 06 gaDesemba.
Okwa popi kutya oonzapo dhaalongwa otadhi ka gandjwa momasiku 06 moka aalongi taya pata.
“Oosikola odha tegelewa dhi kale dha futila po omasiku ngoka gahetatu ga kana okupitila momikalo dha yooloka mekwatathano lyataaleli yiikondo oshowo aakuluntusikola,” ta ti ngaaka.
Ta ti, omasiku ngoka otaga ka futilwa po omanga omvula inaayi pwa ko, ihe itashi kala ethimbo lyomakonaakono.
Steenkamp okwa ti, otaya vulu oku ga futila po momukalo gokulonga konima yootundi nenge mOmalyomakaya.
Maria Shilongo omulongi mosikola yimwe moshitopolwa shaShana okwa ti, etokolo ewaanawa.
“Shika otashi ke tu pa ethimbo lya gwana opo tu ka kuthe ompito oku ka hogolola, natango otashi ulike wo esimano lyomahogololo gopashigwana,” ta ti ngaaka.
Shilongo okwa kumagidha wo uuministeli nomahangano galwe ga kuthe oshiholelwa oshiwanawa opo ya gandje ompito kaaniilonga yawo ya ka hogolole mesiku ndyoka.
Aawulikwa yopaupelesidente yoongundu dha yooloka oya ningi esiku taya kumagidha oshigwana opo shi kuthe ombinga momahogololo, ya vule okuulika omuleli omwaanawa naangoka ta vulu oku ya longela omauwanawa nokulundululula oonkalo dhawo.