OSHAKATI – Uuministeli womaudhano, aanyasha nomayakulo goshigwana anuwa owa ndopa okufuta aayiyambi ye li yahetatu, kehe gumwe oshimaliwa N$150 000, yu uvanekelwa okuza mo2020.

Aayiyambi mboka ye li yahetatu anuwa oya hupu ko, ihe aaniilonga pamwe nayo oya futwa nale oshimaliwa shawo omanga yamwe ya pewa iilonga tayi kalelele muuministeli moka. 

Aayiyambi mboka anuwa ya longele uuministeli womaudhano uule womimvo dha pita 20 noya lalekwa miilonga mo2020 sho epangelo lya nyengwa okuyambidhidha aayiyambi omolwoshimaliwa tashi shongola.

Oya nyenyeta kutya ethimbo olya ningi ele unene ihe uuministeli owa mwena ko ashike, itaya futu iimaliwa yawo.

Esther Immanuel ngoka kwa li ta longele posenda yaanyasha mOshakati okwa ti, oya kala nokukondjitha ya futwe oshimaliwa shawo ihe uuministeli itau ya pe omayamukulo.

“Lwahugunina twa li twa ningi omapulaapulo otwa lombwelwa kutya natu tegelele, oshoka uuministeli wemona owa ipyakadhila niimaliwa yetu,” ta hokolola ngaaka.

Makali Efraim ngoka a li ta longele kosenda Berg Aukas koGrootfontein okwa ti, okwiiyambele uuministeli womaudhano omimvo dha pita po20.

“Omolwashike yakwetu ya ningilwa omauwanawa ihe tse otwa hupithwa ko? 

Otwa kala nokukondjitha iimaliwa yetu yi futwe ihe uuministeli owa mwena ko ashike,” ta nyenyeta ngaaka.

Ta ti, oya hala oshimaliwa shoka opo ya tameke oongeshefa dhawo, ya vule okuyambidhidha aakwanezimo yawo.

Herman Joseph ngoka naye kwa li ta longele koGrootfontein okwa ti, oya loloka okutegelela, ethimbo olya ningi ele.

“Kehe ethimbo tatu pula oshimaliwa shetu otatu shunithwa ko ashike, ano uunake tatu futwa iimaliwa yetu mbyoka ye tu uvanekele,” ta pula ngaaka.

Uuministeli womaudhano momushangwa gwa moniwa komutoolinkundana nguka, gwa shangwa omasiku 25 Maalitsa 2020, ogwa nyolwa kutya okontalaka yaayiyambi otayi ya pehuulilo, nuumisteli otau gandja oshimaliwa N$150 000 ongepandulo sho ya kala taya yambidhidha uuministeli.

Omupopiliko muumnisteli wemona Wilson Shikoto okwa ti , uuministeli wemona ihawu futu ihe ohau pititha ashike oshimaliwa.

“Uuministeli womaudhano nawu longele kumwe ashike naaniilonga yawo, oshoka tse katu na mo sha moshiningwanima shika,” ta fatula ngaaka.

Omupopiliko omukuluntu muuministeli womaudhano naagundjuka Aina Shikesho okwa ti oya tegelela ashike uuministeli wemona wu pitike oshimaliwa shoka opo ya tsikile naashoka ye na okuninga po yo ya fute oshimaliwa shoka.

-vkaapanda@nepc.com.na