OSHAKATI – Uuministeli wuuhaku nonkalonawa owa kondo oshigwana omagulu sho tau konakona oshigwana omikithi ngaashi ombinzi ya londa, osuuka nokugandja omauyelele kombinga yokaankela momauliko giipindi mOshakati.

Sha ikolela komushangwa gwa pitithwa kuuministeli wuuhaku, omakonakono ngoka oga tameke okuza oshiwike sha yi notaga ka hula momasiku gaheyali gaJuni.

“Aakwashigwana otwe ya kondo omagulu opo ya tseye nokukaleka po uundjolowele wawo. Onkene otatu hiya kehe gumwe a thike opo a kale e shi mpoka a thikama nomikithi ndhoka tatu konakona nena mpaka,” ya shanga ngaaka.

Oya kumagidha wo oshigwana kutya osha simana okutseya omikithi dhi li molutu, opo ya vule okwiisila oshimpwiyu nokutseya shoka taya vulu okulya nenge okulonga.

Taya gwedha po kutya ohashi kala oshidhigu ngele omuntu a monika omikithi ngashi ndhoka kwa toka oshoka iha kala po nawa mbala. 

“Oshigwana nashi thikame nena opo shi  minikilwe nokukonaakonwa omikithi dha yooloka momalutu gawo,” ya kumagidha ngaaka.

Maria Shigwedha ngoka a li e na okatala kokulanditha iikwamagadhi yokunika nawa momawuliko giipindi okwa ti, okwa monika ombinzi yi li pevi ihe okwa li a nyanyukwa oshoka kakwa li u uvite ko kutya osha nika oshiponga okumonika ombinzi yi li pevi, ta ti nani kashi li mondjila.

“Onda zi po nda fatululilwa kutya ombinzi oyi na okukala yi li ngiini molutu lwomuntu ngele yi li nawa, itandi hulitha po we okwiikonaakonitha,” ta popi ngaaka.

Shigwedha okwa kumagidha oshigwana shi ye shi ka konakonwe opo shi kuthe omatokolo gomondjila.

-vkaapanda@nepc.com.na