Victoria Kaapanda
Aanafaalama yomomapya oya tameka okulonga omapya gawo ihe oyendji otaya lili ondando yomambakumbaku gopaumwene ngoka ga ningi ondilo, omanga gepangelo ngoka ge na ombiliha taga monika kolusindo.
Aanafalama yomiitopolwa ya yooloka onkene taya ningi omaindilo gomambakumbaku ga indjipalekwe omanga omvula inayi loka unene.
Omupopiliko nomugandji gomauyelele mendiki lyuuministeli wuunamapya Jona Musheko okwa ti, nonando omambakumbaku gepangelo itaga ka indjipalekwa nuumvo omolwonkalo yoshimaliwa, natango uuministeli otawu kondjitha okunengeneka onkalo.
Ta ti nonuumvo uuministeli wuunamapya otau ka kwathela aanafaalama okufuta ko ashike N$350 mowili, uuna ya mono embakumbaku lyopaumwene.
“Kehe embakumbaku lyopaumwene olyi na ondando yoshimaliwa shalyo, onkene uuministeli wuunamapya otau ka futa oshimaliwa shoka, omanga iihupe tayi ka futwa kaanafaalama yoyene,” ta fatulula ngaaka.
Musheko okwa ti, omambakumbaku ngoka oga ishangitha koombelewa dhookansela, opo ga vule okukwathela oshigwana shoka itaashi vulu okufuta oshimaliwa ashihe hashi pulwa mowili nenge itashi ka mona ompito yembakumbaku lyepangelo.
“Shika natango okwa li twe shi eta po okuyambindhindha wo ooyene yomambakumbaku, nayo ya mone omboloto,” ta popi ngaaka.
Selma Nuuyoma gwomomukunda Onaanda okwa ti omambakumbaku gepangelo ohaga kala uupyakadhi aluhe, oshoka ohaga kala taga kondjelwa oshoka kehe gumwe okwa hala oku li longitha omolwondando yago yi li pevi.
“Ohashi kala oshidhigu okutegelela embakumbaku limwe lyi mane ko omagumbo agehe taga pululilwa moshikandjohogololo shimwe,” ta popi ngaaka.
Nuuyoma ta ti, oshikandjohogololo shawo oshi na omikunda odhindji, nakehe gumwe okwa hala okupululilwa.
“Shoka ohashi ke tu thiminika tu ka konge omambakumbaku gopaumwene ngoka ge na ondilo, gamwe taga pula N$550-N$600 mowili,” ta fatulula ngaaka.
Nyanyukweni Nainda gwomomukunda Ondobe okwa ti, okwi ishangitha okupululilwa kembakumbaku lyepangelo, ashike ohaku ya tokitha okulonga omapya gawo ku yele, oshoka omusholondondo gwomadhina ohagu kala omule.
“Epangelo ohali tu pula ombiliha, N$250 mowili yimwe, moka hatu vulu okumona ompito yokupulilitha nando oowili mbali nenge ndatu,” Nainda ta hokolola.
Aahingi yomambakumbaku gopaumwene nayo otaya nyenyeta kutya omahooli oga ninga ondilo, onkene kaye na nkene, ihe otaya gwedha ko kondando yomumvogali.
Elago Shitaatala, omuhingi gwembakumbaku okwa ti oha pula N$550 mowili, nonando aanafaalama yomomapya otaya nyenyeta kutya oshimaliwa oshindji. “Nonando shoka sha kala ngaaka, onkalo otayi kala hwepo omolwa omukalo ngoka gwa tulwa po gwomambakumbaku gopaumwene taga kwathela aanafalama,” ta popi ngaaka.
Ta ti, oyendji oya ishangitha okupululila oshigwana, yo taya futwa etata kuuministeli omanga etata tali futwa kaanafaalama.
Ta gwedha po kutya natango aantu yokulima oshowo mboka ye na oondoongi hadhi pulula, oya kumagidhwa ya ishangithe opo ya vule okulongithwa, ya ka kwathele omagumbo ngoka taga ka kala ge li mompumbwe.
vkaapanda@nepc.com.na