Uuministeli wuuyuuki owa kutha ko kuuwindji wiiyemo yaantu mboka taya kala taya pewa omakwatho gopaveta kehangano lyepangelo lyoLegal Aid.
Ngele tashi ya komakwatho gaakalelipo yopaveta yepangelo, nale epangelo olya li hali yambidhidha aantu mboka ye na iiyemo iishona y ili li poN$3 500 okuuka pevi ihe ngashiingeyi naamboka haya nono iiyemo yoN$7 000 komwedhi nayo otaya ka pewa aakalelipo yopaveta yoshali okupitila moLegal Aid.
Omupopiliko gwuuministeli Edmund Khoaseb, okwa ti elunduliko ndyoka olye ya po sho kwa ningwa omalunduluko komalandulathano gomayambidhidho gopaveta, ngoka ge li kohi yokatendo koLegal Aid Act komomumvo 1990. Omalunduluko ngoka oge lile po okugandja uuyuuki pamayambidhidho gopaveta ga mangulukila kehe gumwe.
“Kohi yokatendo ka talululwa omuntu ha mono oshimaliwa shi li poN$7 000 ota vulu okutalika ko koLegal Aid. Shika osha ningwa nelalakano lyokusa oshimpwiyu kutya aantu oyendji otaya ka vula okukalelwa po paveta,” ta ti ngaaka. Khoaseb ta ti uuministeli otawu ka tegelela wu mone omaindilo gomayambidhidho gopaveta ogendji molwomalunduluko ngoka ga ningwa, sha hala kutya otaku ka kutwa wo aatseyiveta ya gwedhwa po opo ya ka gandje omayambidhidho gopaveta pethimbo.
Ta gwedha ko ta ti okuniwe elalakano lyokukuta aakwatheli yaatseyiveta moshikako-shiimaliwa tuuka, naambaka oyo taya ka kala taya ungaunga niipotha tayi holoka koompangulilo dhoomangestalata.
Okwa ti wo iipotha yopaveta mbyoka kaayi shi yelongo lyiimbuluma nayo otayi ka nkndopekwa.
“Etopolo lyiiyemo yuuministeli lyowina olya ningwa opo uuministeli wu vule okukandula po omaupyakadhi gopankalathano nopamahupilo ngoka ga taalelwa koshigwana, tashi ningwa okupitila momayakulo gopaveta,” Khiaseb ta ti.
Uuministeli wuuyuuki owa gandja oshimaliwa shoomiliona N$35 koLegal Aid, nelalakano oku yi kwatha opo yi gwanithe po iinakugwanithwa mbyoka ye ya nelunduluko notayi ka longela kumwe noLaw Society noLegal Aid Clinic yokoUniversiti yaNamibia opo ku siwe oshisho kutya ayihe mbyoka ya pumbwa oyi li melandulathano.
-Nampa