Epangelo lyaNamibia okupitila muuministeli wiikwameni olya ti, uumutse ashike woshilongo uupe tau ka pitika okuya moBotswana.
Omapangelo ngoka gaali gaBotswana naNamibia oga li ga tula po etso kumweuvathano omwendhi gwayi, opo iilongo mbika iyali yi kale tayi endathana kaape na oondjindikila, ihe okuulika ashike uumutse woshilongo.
Pethimbo ndika, uumutse woshilongo waNamibia otawu longithwa ashike okupita oongamba dhaMamuno /Trans-Kalahari okuya moBotswana.
Omupopiliko muuministeli wiikwameni Sakeus Kadhikwa okwa ti, uuyuni owa thiki ponkatu yoku endela pamwe nuutekinika wopungomba.
“Elongitho lyuumutse woshilongo omukalo gumwe tagu longithwa paife kiilongo yaSADC,” ta ti ngaaka.
Ta gwedhapo kutya okulongitha uumutse uupe okupita okuya moBotswana, itashi ti mboka uukulu itau longithwa we.
Ta gwedha po ta ti, elalakano lyokulongitha uutse uupe, okukwashilipaleka elongitho lyuumutse, no hashi kala oshipu opo kaapulongithwe uulingilingi oshowo okuleshwa komashina ngoka taga longithwa mpoka.
“Mboka taya ka ninga omayindilo guumutse uupe, otaya ka futa ondando ya tulwa po, ihe mboka opo taya ka ninga omayindilo lwotango, opo ya gwanitha oomimvo dhoku ninga okamutse, otaya ka pewa ashike okamutse okape,’’ ta fatulula ngaaka.
Kadhikwa okwa ti, okamutse ohaka pitike ashike aaNamibia ya kale moBotswana oomasiku 30.
Ta ti, ngele omuntu okwa kala moBotswana , ihe ta kala a hala okutsikila niilongo yilwe, otaka longitha opasipota ye, oshoka okamutse koshilongo okapitikwa ashike okulongithwa pokati kiilongo iyali, Namibia naBotswana.
“Ngele owa kanitha okamutse koye omanga wu li moBotswana, kala weshi lopota mbala opo kupitikwe wu longithe opasipota yoye okugalukila koNamibia,” ta fatulula ngaaka.
Elongitho lyuumutse woshilongo ota li kalongitha aaNamibia nuupu okuya koshilongo hoka, oshoka kayena okukaninga omayindilo goopasipota, mboka kaayendhina. Uupyakandhi otau yapo ashike ngele okamutse ka kana.
vkaapanda@nepc.com.na