Charles Ndeumane
Ministera gonodoropa ntani ekuliko nomukunda doponze Erastus Uutoni asi age kuna kuzumbanesa endindiro morwa vakansela kuna kulirwanesa vene navene. Age kakahuyungire posilika sokukagava koOutapi omu navagava yirugana kovatungimo. Awo vahepa kulituiramo mosirugana sawo navenye vasikisemo eyi vana pumbwa vantu vetu monodoropa ntani momukunda horowero. Age katente asi ministeli zendi kluna kwakere noworkshop omu vakansela vamwe vavapere edeuro morwa monomberewa dawo kuna karamu nomutagu nepiyagano. Age simpe katente nye asi nsene vana mana nye kuvapa edeuro eli, vahepa nye kuza konkarapamwe zawo, nokukatameka kukasikisamo eyi vana yavarongo konomberewa zonondango dawo. ‘’ Yitara tupu kansela ogu ana kara asi eyi gadiva yinzi unene, makura okamumone kuna kulyatera nage hena mononzira.
Ove ngakansela kwalye nye oku ono kugazara asi yiko nogava rusivano roge, nye ove kansela? Nye ame nina gava edeuro omu navakara vagendesi wovawa, vanambeerewa wovawa. Nayimwe ngoso kukwama nomberewa dovakansela ntani veta zawo. Mbudi zange kovakansela vangoso kuna kara asi endindiro kuna kusesupa. Konyima apa nye nina kugava edeuro, kuna kumoneka asi eyi navarongo kapi yina kurugana awo kwawo ngwendi nayimwesi. Yimo ana kuyidimburura. Nampili ngoso age kalikidire ruhafo rwendi kondango zaOutapi omu valituramo mekuliko ntani mokugava sirugana kovantu. Yimwe eyi kavageve kovantu kuna kara rutjeno, mema gokunwa ntani evango lyokuzugumina yihando.
Evango lyondango lyaOutapi kwalitarurura kukwama nongendeseso ano ngesi vana lituranye paveta kutunda tupu apa vatura evango eli asi doropa nye ngesi lina kara nevango lyalyene lyokuzugumina yihando. Uutoni katente asi ndango zaOutapi kuna kara zimwe zina kurugana nawa, mwaza sirongo morwa eyi vana kurugana kuyimonenena.
Ame nina hafa mokumona ekuliko lina kugenda moOutapi. Moyitara asi doropa ezi kwazitulire zikare paveta asi doropa mo1997, eyi kuna kumonekerera nawa nawa asi ndango kuna kurugana sirugana sazo, nye eyi kuna kuhorokera morwa nyone, vantu m,watunga modoropa ezi, ntani nompitisili deni edi muna kara nado. Ndango kapi zina kara nonomutangu, nye awo kuna kuruganena kumwe vagave sirugana kovantu vawo, yimo ngoso ana kuyididilika.