ONGWEDIVA – Minista womayambulepo eedoolopa noitukulwa yokomikunda Erastus Uutoni okwa ti ombelewa yaye oya didilika ookansela momalelo eedoolopa vehe na elongelokumwe novanambelewawiliki.
Okwa yelifa ta ti ookansela momalelo eedoolopa ohava kala alushe ve na eenhamanana molwaashi itava longele kumwe novanambelewawiliki.
Onghee okwa ti eshi otashi eta edundakano momalelo eedoolopa.
Okwa yelifa ta ti ombelewa yaye itai popile ovaleli momalelo eedoolopa vehe na elongelokumwe. Edi Uutoni okwe di popya mexuliloshivike kouvalelo wa li wa longekidwa kelelo lodoolopa yaKongo.
Elelo lodoolopa yaKongo otali ka ninga omaulikilo oipindi omaludi momwedi ou, omo oshiwana tashi ka landifa oilandifomwa yOshiwambo ya yooloka.
Uutoni okwa ti elongelokumwe ola fimana momalelo eedoolopa molwaashi otashi eta ovanhu va longe noupu nokutopolelafana omauyelele. Okwa kumaida omalelo eedoolopa opo a kale e na oukumwe nelongelokumwe mokukala tava tula moilonga oinyangadalwa ya yooloka nokuyambula po eedoolopa.
Moshipopiwa shaye, Omupeduprimi Netumbo Nandi-Ndaitwah okwa ti omauliko oipindi omaludi okwa fimana molwaashi otashi xwaxwameke efimano lomufyuululwakalo wOshiwambo.
Onghee okwa ti omauliko oipindi otaa eta oyuuyemo noshoyo eemhito doilonga kavanyasha pefimbo tava ka landifa oilandifomwa yavo.
Nandi-Ndaitwah okwa ti ngeenge taku ningwa omauliko oipindi meedoolopa ohashi yandje omhito koshiwana opo shi landife oilandifomwa yavo ya yooloka mwa kwatelwa oikulya yOshiwambo.
Onghee okwa indila oshiwana opo shi kale tashi yambidida omauliko oipindi shaashi otashi tu ovalandifi omukumo va twikile nokulandifa. Okwa weda po ta ti omauliko oipindi okwa fimana yoo vali shaashi otaa nane ovanangeshefa va yooloka okudja meni nokondje yoshilongo ve uye okukufa ombinga mokulandifa.
Okwa pula omalelo eedoolopa opo a kale taa longifa oshimaliwa osho tava mono okudilila moshiwna okuandjaneka omayakulo meedoolopa noshoyo okuyambula po eedoolopa di kale pamufika muwa.
“Onda pandula elelo lodoolopa yaKongo eshi la tula moilonga opo li kale la ninga omauliko oipindi omaludi neudo. Onghee oshiwana nashi longife omhito ei opo shi kale sha kufa ombinga yokulandifa,” ta ti.