< Victoria Kaapanda
“Nonando owa tala ndje nda tsima, nda zala iikutu inaayi dhengwa oshikangule, nezimba itaali hokitha, ihandi lala nondjala,” Omulandithi gwiingumutulu ta ningi omashendjo ngaaka.
Johannes Joseph ngoka halanditha iiyimati niihulunde komeho goSpar Ongwediva, okwa ti oha menaka ongula yoshilumentu opo a tentene ookasitoma dhongula. “Okamaliwa kandje hoka handi mono mesiku ohaka kwathele ndje okulanda iikulya. Onda thikama momutenya oshoka inandi hala okuthikama konima yekumba,” ta popi ngaaka. Ta ti, ina hala okunyenga iinima yaantu, oshoka ota mangwa po kopolisi.
Joseph ta ti, oyendji ye li moondholongo oya yaka iinima yaantu omolwondjala noluhepo.
“Uuna u na ongeshefa yoye, tokondjitha okumona N$10 oto gwanitha ashike okulanda omboloto nosuuka, e to nu otee,” ta ti ngaaka.
Ta gwedha po ta ti, nonando omasiku gamwe ohaga piti ko kaaku na ookasitoma, ihashi mu shololitha oshoka ngula Pamba ote li sile oshimpwiyu.
“Oshimaliwa kasha na olwaala, ngele okwa tiwa natu ye kongeleka atuhe otatu umbu ashike ongalo, nongele okwa tiwa natu yeni koshituthi shontumba, atuheni otatu zaleni owala omizalo omiwanawa,” ta popi ye ta imemeha.
Joseph okwa kumagidha aanyasha aakwawo ya thangele omutumba noluhepo kokule. Ta ti, ngele owa shuwa nkene oshimaliwa hashi kongwa nena ku na esiku wu se ondjala.
“Ihandi ndhilaadhila noku ka konga iilonga yilwe oshoka ngame omunangeshefa kungame mwene. Omimvo ntano komeho oto adhan dje ndi na etungo lyi thike mpoka,” ta ulike ositola yaSpar ye tayolo.
– vkaapanda@nepc.com.na