OSHAKATI – Ngaashi onkalondjigilile omumvo kehe, oositola tadhi landitha iikwathitholonga yosikola monooli odhu udha aavali taya landa, sho osikola tayi tameke ngula.

Oosikola otayi tameke momasiku 14 gaJanuali, mEtine naalongwa oyendji oya tegelelwa ya kale yena iilongithomwa omizalo dhosikola ngaashi ya nyololewa koosikola dhawo.

Kundana sho a li a piti positola tayi ithanwa Pep mOshakati okwa li a mono aavali yamwe ye li momukweyo omuleeleka ye na iilongithomwa ya yooloka pomake. 

Oositola ngaashi Waltons, Jet osho wo Shoprite nadho odhu udha aavali taya landa iilongithomwa yosikola. 

Joseph Johannes ngoka a li e li momukweyo mositola Pep okwa ti  ota landele aanona ye opo ya wape okukatameka osikola yeli momizalo omipe ngaashi aalongwa aakwawo.

“Ngame kandi na nando uudhigu oshoka onda kala nda longekidha oshimaliwa shaanona yandje oshoka ondi shi shi kutya oye na okuya kosikola, otaya landelwa we kulye ngele ha ngame,’’ ta pula ngaaka.

Rosalia Inkono okwa ti okwa lulilwa oshoka uunona we owindji, teu gwanithila po ashihe shoka tashi pumbiwa kosikola.

“Otandi landa ashike shoka tandi vulu okugwanitha po, ihe haayihe, ihandi longo ohandi nyangadhala ashike,” ta nyenyeta ngaaka.

Monika Kaleb ngoka kwali talanda iinima yaanona ye yokosikola mositola Watons mOshakati okwa ti, oya ndhigupalelwa kuudhigu mbuka omumvo kehe. 

“Ondi na aanona ye li yatano, ihe ayehe otaya pumbwa omayambidhidho giilongithomwa yosikola. Ondili muudhigu, yakwetu epangelo nali yambidhidhe, wo mpoka tai vulu” ta lili ngaaka. 

Ta ti, kashi ivule osikola yi kale hayi futwa, oshoka paife epangelo olye tu tenteke ashike uudhigu.  

“Paife ohatu longitha oshimaliwa oshindji unene shi vulithe nale, sho aanona kwa li haya pewa omambo koosikola,” Kaleb ta popi ngaaka.  

Ta gwedha po ta ti, oosikola dhepangelo paife kadhi ivule naandhoka dhopaumwene, odha ninga ondilo.  “Epangelo nali ete po elunduluko,” ta indile. -vkaapanda@nepc.com.na