OSHAKATI – Opolisi moshitopolwa shaShana oya kumagidha oshigwana shi kale tashi uvu nokutula miiloga omakumagidho gopolisi, opo kaashi ninge iihakanwa yiiningwanima tayi holoka moshigwana.
Omugandji gomauyelele gwopolisi moshitopolwa shaShana Thomas Aiyambo okwa ti, oya kala nokukumagidha oshigwana shi kale sha kotokela ookalyamupombo mboka taya longitha omikalo adhihe okuyuga oshigwana oshimaliwa.
“Aafuthi otaya longo unene naamboka opo ya penzelwa miilonga, taya longitha omikalo dhuulingilingi oku ya yuga iimaliwa,’’ ta fatulula ngaaka.
Aiyambo okwa li a popi ngaaka sha landula oshiningwanima shoka sha holoka oshiwike sha zi ko, sho omukulukadhi e li moshipundi shevululuko taku hokololwa a yugwa iimaliwa ye nomukalo gokukengelelwa.
Ta hokolola kutya omukalimo gomolukanda Oneshila mOshakati, Etitatu lya zi ko okwa li a adhika pegumbo lye komulumentu gumwe ngoka anuwa a li ta pukululwa pehala lyontumba.
“Oya li anuwa ye ende okanano okashona. Kopate okwa li kwa zi okahauto, hoka omulumentu ngoka a li a lefe, opo ya falwe pehala mpoka ta pukululwa oshoka anuwa ota futu, ye a galulwe natango kokahauto hoka,” ta ti ngaaka.
Aiyambo okwa hokolola kutya okahauto hoka oka li ka hingi sigo okonima yositola Super Dupa mOshakati, nokonima yawo okwa li kwa zi ohauto yi na aapolisi yiifundja.
Ta ti aapolisi mboka anuwa okwa li ye ya kankameke e taya tseyithile aakwashigwana kutya oye li mepuko oshoka otaya landitha ‘oogouta’ (ano oshingoli), noya ti otaye ya manga.
“Omukulukadhi ngoka e na iimaliwa yopenzela ye kombaanga, anuwa okwa li a pulwa ongodhi ye yopeke ee ta pulwa a tule mo uukwatya awuhe, e taya kutha ko oshimaliwa N$166 000,’’ ta popi ngaaka.
Opolisi otayi indile kehe ngoka e na uuyelele kombinga yoshiningwanima shika opo a lopotele opolisi yi li popepi naye. Oya gwedha po kutya oshigwana nashi kale shi na oonomola dhopolisi opo ku lopotwe mbala uuna ya mono omayinyengo taga limbililike.
Moshinigwnima inaashi faathaana okanona komimvo 11 oka kwatwa koonkondo kuwalye omanga taka zi kosikola mehuliloshiwike.
Oshiningwanima shoka osha holoka momudhingoloko gwOndangwa, moshitopolwa shaShana.
Aiyambo okwa kumagidha aavali ya kale aluhe taya kwashilipaleke kutya aanona oye li megameno okuya nokuza kosikola, oshowo momagumbo.
vkaapanda@nepc.com.na